«Úleskerlermen kezdesýdi ári qaraı jalǵastyramyn. Búgin taǵy 5 kóppáterli turǵyn úı kesheniniń úleskerlerimen kezdestim. Olardyń qatarynda «Korgaljınskıı kvartal», «Komsomolskıı», «Shyǵys 4-1», «Turan-Syǵanaq» turǵyn úı keshenderiniń úleskerleri, sol sııaqty «Nash dom Anısa» turǵyn úı kooperasııasynyń ókilderi bar.
Atalǵan kóppáterli turǵyn úı keshenderindegi úleskerlerdiń jalpy sany - shamamen 1,5 myń adam. Jyldar boıy turǵan úılerdiń jaı-kúıi ártúrli. Birinde jaqtaýy ǵana kóterilgen, al endi birinde irgetasy ǵana tur. Máselen «Shyǵys 4-1» turǵyn úı kesheniniń keıbir bloktary tek irgetasy kúıinde ǵana tur», dep jazdy ákim óziniń Instagram paraqshasynda.
Sondaı-aq kezdesý barysynda úleskerler túrli problemalardy qozǵady. Ol máselelerdiń qatarynda úıdiń qurylysy, ınjenerlik jeliler, sol sııaqty abattandyrý, qujattama jáne t.b. bar. Ákim qurylys qarqynyn arttyrýdy tapsyrdy.
«Qurylysy uzaqqa sozylǵan 51 nysannyń ishinde osyǵan deıin 36 nysannyń problemalary sheshildi. Qalǵan 15 nysannyń 7-eýin aldaǵy aılarda aıaqtaımyz, 8 nysan 2023 jyly aıaqtalady», dep jazdy ákim.
Qala ákimi mundaı kezdesýlerdi barlyq úleskermen, sol sııaqty qalanyń eldi mekenderi men aýdandarynyń turǵyndarymen jeke kezdesý uıymdastyratynyn atap ótti.
