Ekinshi kezekti qoldanysqa engizý «Qazhromnyń» ferroqorytpa zaýyttarynyń qalypty jumysyn qamtamasyz etýde mańyzǵa ıe. Sondaı-aq Hromtaý qalasy men el ekonomıkasy úshin strategııalyq turǵydan mańyzdy.
Qazaqstan Táýelsizdiginiń 10 jyldyǵy atyndaǵy shahtanyń ekinshi kezeńine «Mıllıonnoe» jáne «Almaz-Jemchýjına» ken oryndary, alty jerasty gorızonty, sondaı-aq tereńdigi 1 shaqyrymnan asatyn shahtalyq uńǵymalar jatady. Ekinshi kezeńniń jobalyq qýaty boıynsha jylyna 6,5 mln tonnadan astam ken shyǵarylady. «Qazaqstan Táýelsizdiginiń 10 jyldyǵy» atyndaǵy shahtanyń ekinshi kezeńi qurylysyna ERG kompanııasy 877,6 mlrd teńge ınvestısııa salmaq.
Qazaqstanda alǵash ret qoldanylǵan ozyq tehnologııalardyń arqasynda mundaǵy uńǵylaý jumystary jaqsy jyldamdyqpen júrgen. Taý-ken massasynyń 30 vagon-arbasy syrtqa shyǵarylypty. Osy ýaqyt ishinde kendi arshý jumystary júrip jatqanda, jerústine tek bos jynystar shyǵaryldy. Búginde uńǵyma jumystary ken massıviniń boıymen júrgizilýde, óńdeýge jaramdy ilespe ken shyǵa bastady. Kenshiler negizgi óndirý jumystaryna barynsha daıyndalyp jatyr.
– Bul kompanııa úshin tarıhı sát. Mańyzdy kezeńniń elimizdegi eń iri taý-ken óndirýshi kompanııanyń damýyna ǵana emes, tutas Hromtaýdyń bolashaǵyna qatysy bar. Sebebi óndirilgen árbir jańa tonnanyń artynda jergilikti turǵyndar tur. Munda óndirýdiń jańa tehnologııalary qoldanylatyn bolady. Al tehnıkalyq jaǵynan joǵary deńgeıde jabdyqtalýy, jaraqtandyrylýy qol eńbegin aıtarlyqtaı azaıtyp, eńbek qaýipsizdigi men árbir kenshiniń ónimdi jumys isteýin arttyrady, – deıdi «Qazhrom» basshysy Sergeı Prokopev.
Qazirgi ýaqytta shahtanyń jańa gorızontynda taý-ken uńǵyma jáne qurylys-montaj jumystary jalǵasyp jatyr. Ferroqorytpa óndirisi úshin negizgi óndirýdi iske qosý 2024 jyldyń basyna josparlanǵan. Birinshi jyly munda shamamen 400 myń tonna joǵary sapaly shıkizat óndiriledi dep josparlanyp otyr.
ERG dırektorlar keńesiniń tóraǵasy Aleksandr Mashkevıch buǵan deıin baspasóz máslıhatynda «Qazirgi kúni kúrdeli ınjenerlik joba – «Qazaqstan Táýelsizdiginiń 10 jyldyǵy» atyndaǵy shahtanyń ekinshi kezeńiniń qurylysyn iske asyryp jatyrmyz. Uńǵymanyń tereńdigi bir shaqyrymnan asady. Bul kúrdeli tehnologııalyq ınjenerlik sheshimderdi talap etetin álemdik deńgeıdegi geologııalyq mindet. Jobany júzege asyrý úshin kóshbasshy kompanııalardy jumyldyrdyq», degen bolatyn.
Aıta ketý kerek, ERG búginde Qazhromnyń ferroqorytpa zaýyttarynda óndiriletin barlyq kendi qaıta óńdeıdi jáne úshinshi tarapqa bermeıdi.
