Atalǵan baıqaý on tórt elden kelgen ónerpazdardy bir arnaǵa toǵystyryp, bekzat ónerdiń baıraǵyn bıikke áýeletti. Dúbirli báıgede «Astana Operanyń» shashasyna shań juqpaǵan júırikterimen birge Qytaı, Germanııa, Reseı, Ázerbaıjan, Belarýs, Armenııa, О́zbekstan jáne taǵy basqa memleketterdiń topjarǵan talanttary óner kórsetip, elorda turǵyndary men qonaqtaryna tamasha tartý jasady.
Festıval shymyldyǵy ulttyq mýzykamyzdyń klassıkasyna aınalǵan, kórnekti kompozıtor Muqan Tólebaevtyń «Birjan – Sara» operasymen ashylyp, odan keıin L.Mınkýstyń «Don Kıhot», Dj.Pýchchınıdiń «Týrandot», P.Chaıkovskııdiń «Aqqý kóli» jáne «Evgenıı Onegın» atty spektaklderi usynyldy. Sondaı-aq opera jáne balet óneriniń gala-baǵdarlamalary da mazmundy is-sharany odan ári baıyta tústi. Al baıqaý shymyldyǵy A.Hachatýrıannyń ańyzǵa aınalǵan «Spartak» baletimen jabyldy. Barlyq biregeı qoıylymdaǵy basty partııalardy elordalyq teatr ártisteri men shaqyrylǵan solıster kezektesip somdap, kórermenderdi klassıkalyq mýzykanyń qaınaryna qandyrdy.
Shyndyǵynda, bul festıval – óner báıgesi ǵana emes, opera jáne balet ónerpazdarynyń bir-birimen jaqyn tanysyp, tájirıbe almasýǵa keń múmkindik berdi. Máselen, Qytaıda ómirge kelip, qazir Bavarııa memlekettik opera jáne balet teatrynyń jetekshi solısi bolyp júrgen Szınhao Chjan «Astana Operanyń» sahnasynda atalǵan teatrdyń balet trýppasymen birge óner kórsetkenine rıza ekenin aıtsa, Ázerbaıjan memlekettik akademııalyq opera jáne balet teatrynyń solısi Sabına Asadova bizdiń elimizge alǵash kelgendegi áserimen bólisti. «Men buǵan deıin Qazaqstanda bolǵan emespin. Endi jaqyn tanydym. Ásirese qazaq mádenıeti men salt-dástúri erekshe unady. Sondaı-aq sáýleti kelisken «Astana Opera» teatrynyń sahnasynda óner kórsetkenime qýanyshtymyn. Festıvalge kelgendegi senimim aqtaldy. Qazaqstandyq áriptesterime shyǵarmashylyq tabys tileımin!» dep júrekjardy tilegin jetkizdi. Sonymen qatar О́zbekstandaǵy Álisher Naýaı atyndaǵy memlekettik akademııalyq úlken teatrynyń solısi Djabraıl Idrısov ta elordalyq teatr men onda qyzmet isteıtin ónerpazdarǵa jyly lebizin bildirdi.
Qoryta aıtqanda, «Astana Opera» teatrynda dúrkirep ótken «Jibek joly» halyqaralyq festıvali – Qazaqstannyń álemdegi mádenı qatynastarǵa esigi aıqara ashyq ekenin kórsetti.
