IOFS jyl boıy Afrıka aýylsharýashylyq sektoryn damytý jónindegi strategııalyq baǵdarlamasy aıasynda jumys istedi. Uıymnyń Afrıka elderiniń úkimetterimen jáne ózge de seriktesterimen birigip atqarǵan qyzmeti nátıjeli boldy. Bul týraly forýmǵa qatysqan uıym ókilderi aıtty.
IOFS uıymynyń málimeti boıynsha 2014 jyldan beri Afrıkada ashtyqtan qınalǵandar sany 47,9 mln adamǵa ósip, qazir 250,3 mln-ǵa jetken.
– Biz «Afrıka jylyn» jarııalaǵan soń, Afrıkanyń Azyq-túlik qaýipsizdigi bastamasyn (Africa Food Security Initiative – AFSI) júzege asyrdyq. Bul jumys ary qaraı jalǵasady. Osy oraıda, barlyq múshe memleketterdi jáne halyqaralyq uıymdardy aldaǵy ýaqytta da seriktes bolýǵa shaqyramyz. Biz biriksek, budan da asqan tabysqa jetemiz dep úmittenemin, sizderdiń qoldaýlaryńyz mańyzdy, – dedi IOFS bas dırektory Erlan Baıdáýlet.
Forýmǵa qatysýshylar Islam álemi elderindegi azyq-túlik qaýipsizdigi baǵdarlamalaryn úılestiretin negizgi alań retindegi IOFS pozısııasyn atap ótti. Olardyń aıtýynsha, jas uıymnyń áleýeti zor jáne álemdegi azyq-túlik daǵdarysy ósip kele jatqan jahandyq syn-qaterlerine der kezinde jaýap beredi. AQIU Atqarýshy keńesiniń tóraǵasy Masýd Djarallah ál Marrı, uıymnyń negizgi jumysyna toqtaldy.
– Islam Azyq-túlik qaýipsizdigi uıymy saraptama jáne tehnıkalyq bilim berý, azyq-túlik qaýipsizdigi jaǵdaıyn baǵalaý jáne baqylaý, gýmanıtarlyq kómek kórsetý arqyly Islam elderindegi azyq-túlik qaýipsizdigi máseleleri boıynsha tyndyrymdy jumys atqaryp keledi. Sonymen qatar shóleıtti jerlerdi qalpyna keltirý, ormandardy kesý, jer erozııasy jáne tuzdanýy sekildi máselelerdi sheshýge de atsalysady. Osy oraıda, Azyq-túlik qaýipsizdigi jónindegi Islam uıymy barlyq múshe-memleketterdi uıymmen yntymaqtastyqty nyǵaıtýǵa jáne álemdegi azyq-túlik qaýipsizdigi júıesin qurýǵa shaqyrady. Sonyń ishinde uıymnyń baǵdarlamalary men qyzmetin halyqqa túsindirý, azyq-túlik qaýipsizdigi máselelerine qatysty máselelerdi sheshý úshin múshe memleketter arasyndaǵy yntymaqtastyq pen túsinistikti arttyrýǵa umtylys jasaý qajet, – dedi ol.
Prezıdent Q.Toqaevtyń jahandyq deńgeıde de, óńirlik deńgeıde de azyq-túlik qaýipsizdigin qamtamasyz etýge erekshe kóńil bólip otyrǵanyn aıta ketken jón. BUU Bas Assambleıasynyń 77-sessııasynda Qasym-Jomart Toqaev IOFS arqyly aýqymdy halyqaralyq gýmanıtarlyq aksııalar úshin azyq-túlik qorlaryn jınaqtaýǵa dúnıejúzilik kómek kórsetý maqsatynda «Azyq-túlik qaýipsizdigi jónindegi Islam uıymymen (IOFS), sondaı-aq BUU agenttikterimen yntymaqtastyqty nyǵaıtý nıetin» jarııalaǵan bolatyn.
AО́SShK sammıtinde de Memleket basshysy: «Biz mańyzdy ónimderdiń ulttyq standarttarǵa sáıkestigin baǵalaýdyń biryńǵaı tásilin ázirleýimiz kerek, sondaı-aq taýarlardyń osy sanaty úshin AО́SShK-ke múshe memleketter arasynda «jasyl» dálizder qurýymyz kerek», dep shtab-páteri Astanada ornalasqan Azyq-túlik qaýipsizdigi jónindegi Islam uıymymen yntymaqtastyqty jolǵa qoıý AО́SShK úshin perspektıvaly baǵyt ekenin atap ótken edi.
– Turaqty azyq-túlikpen qamtamasyz etý jyl ótken saıyn ózekti bolyp barady, ol memleketaralyq yntymaqtastyqtyń basym baǵytyna aınaldy. Tıimdi memleketaralyq yntymaqtastyqty qurýda halyqaralyq uıymdarǵa erekshe ról júkteledi. Sondyqtan IOFS sııaqty uıymnyń negizgi róli – kelisilgen is-áreketterdi júzege asyrý maqsatynda IOFS jáne OIC-ke múshe elderdiń kúsh-jigerin biriktirip otyr. Eń bastysy, bizdiń óńirdegi azyq-túlik qaýipsizdigi jáne ashtyqqa qarsy kúres máseleleri boıynsha turaqty jáne uzaq merzimdi sharalar qabyldanyp jatyr, – dedi Aýyl sharýashylyǵy mınıstriniń orynbasary Ábilqaıyr Tamabek forým barysynda.
Afrıka qurlyǵyna osy qıyn-qystaý kezeńde azyq-túlik qaýipsizdigi men aýyl sharýashylyǵyn damytýǵa kómektesý, kómekke muqtaj Afrıka halqyna qoldaý bildirý Azyq-túlik qaýipsizdigi jónindegi Islam uıymynyń negizgi ustanymy. Ol eldiń turǵyndaryn azyq-túlikpen qamtamasyz etip, qol ushyn sozýdy aldaǵy ýaqytta da jalǵastyrady.
