Senator kezdesý barysynda Germanııa Qazaqstannyń Eýropalyq odaqtaǵy mańyzdy strategııalyq áriptesi ekenin atap ótti. Ol eki eldiń Parlamentterinde jumys istep kele jatqan dostyq toptary parlamentaralyq dıalogtyń berik negizin quraıtynyna toqtaldy.
Lázzat Qaltaeva elimizdi odan ári demokratııalandyrý jáne azamattardyń memleketti basqarýǵa qatysýyn keńeıtýge baǵyttalǵan aýqymdy saıası jańǵyrtý baǵdarlamasy týraly habardar etti. Senator Memleket basshysynyń bastamalary elimizdiń qazirgi saıası júıesin túbegeıli ózgertetinine toqtaldy.
«Búginde Qazaqstan óz damýynyń mańyzdy tarıhı kezeńinde tur. Memleket basshysynyń bastamasy boıynsha barlyq salalarda keshendi jáne júıeli ózgerister júrgizilýde. Saıası partııalardy tirkeý rásimi jeńildetildi, tirkeý kedergisi tómendetildi. Saılaýaldy partııalyq tizimderde jáne depýtattyq mandattardy bólý kezinde áıelder men jastarǵa 30 paıyzdyq kvota engizildi. Saıası partııalardyń Májiliske ótý shegi 7-den 5%-ǵa deıin tómendetildi. Parlamenttik oppozısııa ınstıtýty quryldy. Aýyl ákimderin tikeleı saılaý tetigi jáne taǵy basqa da ózgerister engizildi. Elimizde «kúshti Prezıdent – yqpaldy Parlament – esep beretin Úkimet» formýlasyna sáıkes saıası jańǵyrtý júzege asýda», dedi Lázzat Qaltaeva.
Krıstıan Gorke óz kezeginde eki eldiń yntymaqtastyǵyn odan ári nyǵaıtýdyń mańyzyna toqtaldy jáne memleketter arasyndaǵy dıplomatııalyq qatynastar ornaǵan sátten bastap 30 jyl ishinde Qazaqstan ózin senimdi saıası jáne ekonomıkalyq áriptes retinde kórsetkenin atap ótti.
