Kezdesýde otandyq qor naryǵyn, onyń ishinde baǵaly qaǵazdar naryǵynyń ınfraqurylymyn damytýdyń, ınstıtýsıonaldyq jáne bólshek ınvestorlardy tartýdyń, Qazaqstan qor bırjasy qyzmetiniń ózekti máseleleri talqylandy. Senatorlarǵa sondaı-aq IPO ótkizýdiń aldyn ala qorytyndylary jáne kvazımemlekettik sektor sýbektileriniń aksııalardy jarııa ornalastyrýǵa shyǵarý jospary týraly aıtyldy.
Komıtet tóraǵasy Dáýren Ádilbekov kezdesý barysynda Memleket basshysy memlekettik organdardyń aldyna otandyq qor naryǵyn belsendi damytý mindetin alǵa qoıǵanyn atap ótti.
«Prezıdent Qasym-Jomart Kemeluly Toqaev elimizdiń azamattary ulttyq kompanııalardyń aksııalaryn satyp alyp, dıvıdendter alýy tıis ekenin atap ótti. Bul halyqtyń ınvestısııalyq mádenıetin qalyptastyrý jáne IPO-ǵa qatysýdyń qoljetimdiligin arttyrý qajettigin kórsetedi. Ulttyq kompanııa aktıvterin básekelester ortasyna shyǵarý memlekettiń ekonomıkaǵa qatysýyn azaıtýǵa múmkindik beretini belgili. Mundaı sharalar ulttyq kompanııalarǵa degen senimdi arttyrady jáne olardyń damýyna yqpal etedi dep sanaımyn», dedi senator.
KASE ókili óz kezeginde bırjanyń 4 naryqqa qyzmet kórsetetini týraly parlamentshilerge aıtyp berdi. Olardyń ishinde qor, aqsha, valıýta jáne týyndy quraldar naryǵy bar. 2022 jyldyń 11 aıynyń qorytyndysy boıynsha búkil naryqtaǵy saýda-sattyqtyń jalpy kólemi ótken jyldyń tıisti kezeńimen salystyrǵanda 59%-ǵa ósip, 235,5 trln teńgeni qurady.
Qazirgi ýaqytta KASE-de mámile jasasý úshin jarty mıllıonnan astam qazaqstandyqtyń ınvestısııalyq shoty bar ekeni de aıtyldy. Olardyń bırja aksııasyndaǵy saýda-sattyq úlesi shamamen 50% qurap otyr. Bul rette 2022 jyldyń 11 aıynda naryqty 22,6 trln teńgege kapıtaldandyrý kezinde KASE-degi aksııamen saýda-sattyq kólemi 108 mlrd teńgeni qurady.
Kezdesýde «QazMunaıGaz» ulttyq kompanııasy» AQ, «Samuryq-Qazyna «UÁQ» AQ, sondaı-aq Qarjy naryǵyn retteý jáne damytý agenttiginiń ókilderi de baıandama jasady.
