Is-sharany ashqan «Amanat» partııasynyń tóraǵasy Erlan Qoshanov aldaǵy ýaqytta bul jobanyń aıasyn keńeıtip, aýdandyq, oblystyq, sodan keıin respýblıkalyq deńgeıde ótkizýdi usyndy.
«Nebir týma talanttar aýyldarda júr. «Uly dala» baıqaýy sol talanttardyń túlep ushar uıasyna aınalýǵa tıis. Qazaq ádebıetiniń keleshegi tek shyǵarmashylyq qaýymdy ǵana emes, barshamyzdy alańdatady. Ádebıettiń bolashaǵy – ulttyń bolashaǵy. Sondyqtan jańa dáýirde jańa esimder kerek. Tek olardy izdep-taýyp, qamqorlyq kórsetý qajet. Jastardy yntalandyryp, jolyn ashý úshin «Amanat» partııasy osy baıqaýdy uıymdastyryp otyr», dedi Erlan Qoshanov.
Aıta keteıik, 26 tamyz ben 10 qarasha aralyǵynda baıqaýǵa bas-aıaǵy 152 shyǵarma kelip tústi. Onyń barlyǵy aikyn.kz saıtynda arnaıy ashylǵan «Uly dala baıqaýy» aıdarynda búrkenshik esimmen jarııalanyp otyrdy.
«Tolqyndy tolqyn qýady. Keshegi aǵa býynnyń, búgingi orta býynnyń izin jalǵaıtyn talanttarymyz ádebıet aıdynynda az emes. Sol sebepti daryndy jastardyń sýyrylyp alǵa shyǵýy – zańdylyq. Baıqaýdyń basty maqsaty – jas qalamgerlerdi yntalandyrý, qanattandyrý. Sondyqtan bul baıqaý aldaǵy ýaqytta da jalǵasyn tabady», dedi Májilis depýtaty, qazylar alqasynyń tóraǵasy Amanjol Áltaı.
Sonymen, «Poezııa» atalymy boıynsha birinshi oryndy Jánibek Álıman, ekinshi oryndy Shapaǵat Ábdiruly, úshinshi oryndy Tańsáýle Ágenqyzy ıelendi.
«Proza» atalymynda birinshi orynǵa Álıhan Jaqsylyq, ekinshi orynǵa Ádil Áýezhanov, úshinshi orynǵa Aızat Raqysheva laıyqty dep tanyldy.
«Balalarǵa arnalǵan shyǵarma» atalymy boıynsha birinshi oryndy Alpysbaı Ábdiluly, ekinshi oryndy Quralaı Omarova, úshinshi oryndy Aısulý Álmash qanjyǵalady.
«Dramatýrgııa» atalymynda birinshi oryndy Yqylas Shalǵynbaı, ekinshi oryndy Aqlıma Saparova, úshinshi oryndy Toqtaráli Tańjaryq jeńip aldy.
Sonymen qatar bıyl tuńǵysh ret taǵaıyndalǵan «Alash amanaty» arnaıy syılyǵyn alashtanýshy-zertteýshi, balalar jazýshysy Eldos Toqtarbaı, «Ahmet Baıtursynulynyń 150 jyldyǵyna arnalǵan» arnaıy syılyqty aqyn, jazýshy, kınossenarıst Ularbek Nurǵalymuly ıelendi. Al «Muhtar Áýezovtiń 125 jyldyǵyna arnalǵan» arnaıy syılyqty jazýshy Abaı Aımaǵambet jeńip aldy.
«Kez kelgen baıqaý jarq etip jarııalanǵanda emes, dástúrge aınalǵan kezde oǵan avtorlar daıyndyqpen kelip, óz jemisin bere bastaıdy. Bıyl bul shyǵarmashylyq báıge Ahmet Baıtursynulynyń 150 jyldyǵyna arnalǵannan keıin avtorlarǵa onyń jaýapkershilik júgi jeńil bolmaǵany anyq. Ádebıet – tutas qoǵammen ushtasyp jatqan dúnıe. Sondyqtan ádebıetti qoldaý – tek rýhanııatty qoldaý emes, jalpy qoǵamnyń oń betburysyna áser etý degen sóz», dedi Ularbek Nurǵalymuly.
Sondaı-aq partııanyń ortalyq apparatynda ótken is-sharada Qostanaı oblysynyń Torǵaı aýylyndaǵy «A.Baıtursynuly men M.Dýlatulynyń ádebı mýzeıiniń» qyzmetkerleri kórme uıymdastyrdy. Onda ult ustazy tutynǵan zattar, qundy jádigerler, qaıratker shyǵarmalarynyń túpnusqasy jáne t.b zattar qoıyldy.
