Bul elimizdiń joǵary oqý ornynan keıingi bilim berý uıymdarynda blokcheın-ınjenerııa jáne komplaens boıynsha bilim berý baǵdarlamalaryn ázirleý jáne engizý úshin qazaqstandyq tarapqa bilim berý materıaldaryn usyný týraly memorandýmǵa sáıkes júzege asyrylmaq. Mundaı memorandýmǵa Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın, Ǵylym jáne joǵary bilim mınıstri Saıasat Nurbek jáne Ulttyq banktiń Tólem jáne qarjylyq tehnologııalardy damytý ortalyǵynyń basshysy Bınýr Jalenov jáne Binance Kazakhstan ókili Jaslan Mádıev qol qoıǵan bolatyn.
Osylaısha, Qazaqstan joǵary jáne joǵary oqý ornynan keıingi bilim berý uıymdarynda memlekettik aýqymda bilim berý baǵdarlamasyn engizetin álemdegi birinshi el bolmaq. Elimizdiń 22 bilim berý uıymy pılottyq tártipte 40 myńnan astam stýdent daıyndaıdy. Blokcheın-tehnologııalar salasynda bilim alyp, daǵdylanǵan jas kásipqoılar blokcheın ındýstrııasynyń jahandyq qaýymdastyǵy úshin iri resýrsqa aınalady. Bul blokcheın ındýstrııasyndaǵy teńdesi joq eń iri jahandyq bilim berý bastamasyna balanyp otyr.
– Ekonomıka úshin básekege qabiletti mamandardy daıarlaýǵa múddelimiz. Sondyqtan biz IT-salanyń ókilderimen birlesip, bul baǵytta bilim berý jobalaryn odan ári damytý úshin berik irgetas quryp jatyrmyz. Jemisti yntymaqtastyqtyń nátıjesinde, otandyq joǵary bilim berý júıesi el ekonomıkasyna ǵana emes, jahandyq eńbek naryǵy úshin de blokcheın ındýstrııasy salasyndaǵy mamandardy jetkizýshi bolmaq, – deıdi Ǵylym jáne joǵary bilim mınıstri Saıasat Nurbek.
B.Mýsınniń pikirine qaraǵanda, Binance Academy-men memorandýmǵa qol qoıý rásimi – Binance bas dırektory Chanpen Chjaonyń mamyrdaǵy sapary aıasynda bastalǵan seriktestiktiń qısyndy jalǵasy. Osy kelisim sheńberinde kadrlardy daıarlaý álemdik krıptoındýstrııada qazaqstandyq tehnologııalar úlesin ulǵaıtýǵa jáne Qazaqstanda aımaqtyq habty damytýǵa jol ashady.
– Qazaqstannyń sıfrlyq tehnologııada jetekshi oıynshyǵa aınalǵanyn qalaımyz. Ol úshin bilim deńgeıin kóterip, búkil el boıynsha blokcheındi engizý kerek. Binance bilimge erekshe mán beredi jáne Binance Academy blokcheın ındýstrııasyndaǵy eń iri oqý ortalyqtarynyń biri bolyp sanalady. Qazaqstandaǵy memlekettik uıymdarmen seriktestigimiz barlyǵyna qoljetimdi ári standarttalǵan blokcheın jáne krıptografııalyq bilim berý jolyndaǵy mańyzdy qadam boldy, – deıdi Binance Asia dırektory Gleb Kostarev.
Eske sala keteıik, Binance – álemdegi blokcheın-tehnologııa salasyndaǵy kóshbasshylardyń biri.
– Qazaqstan sıfrlyq tehnologııalardy damytý jáne engizý jolynda belsendilik tanytyp, óz kadrlaryn daıarlaýǵa umtylyp jatyr. Jańa kelisim Qazaqstanǵa Binance bilim bazasynda bilim berý baǵdarlamalaryn Ortalyq Azııa óńirinde engizýge basym quqyq beredi. Bul Astana Hub qatysýshylary úshin úlken artyqshylyq bolmaq. Oqytý Astana Hub-ta ornalasqan Blokcheın ortalyǵynyń bazasynda ótetindikten, stýdentterge alǵan bilimdi tájirıbe turǵysynan bekitýge jaqsy múmkindik týyp tur, – deıdi Astana Hub bas dırektory Maǵjan Mádıev.
Binance jáne Binance Academy bilim berý bólimshesi birlesip, blokcheın-ınjenerııa jáne komplaensqa qatysty bilim berý materıaldaryn Blokcheın ortalyǵyna beredi. Sondaı-aq oqytýshylardy oqytý men trenıngti uıymdastyrýda járdemdesýdi josparlap otyr. Baǵdarlamany engizý tórt kezeńnen turady. Birinshi kezeńde Binance Academy bilim berý materıaldary negizinde joǵary oqý oryndarynyń oqytýshylary úshin akademııalyq baǵdarlamalar boıynsha oqytý baǵdarlamalary ázirlenedi. Ekinshi kezeńde oqytýshylardy oqytý jáne trenıng ótkizý (birlesken vebınarlar men dárister), úshinshi kezeńde oqýdan ótken oqytýshylarmen jáne joǵary oqý oryndary basshylyǵymen birlesip, akademııalyq baǵdarlamany ázirleý kózdelgen. Baǵdarlama 4-5 pánnen (kýrstan) turady. Tórtinshi kezeńde stýdentter úshin joǵary oqý oryndary bazasynda mamandandyrýdy iske qosý qolǵa alynbaq. Bul rette oqytýshylardy oqytý jáne trenıng ótkizý 2023 jyly aqpan aıynda bastalyp, mamyrǵa deıin jalǵasady. Stýdentterdi oqytý 2023 jyldyń qyrkúıeginde bastalmaq.
