Men Aıtaǵamdy mekteptegi oqýshy kezimde kórip, ónerine tánti bolǵanmyn. Júrsin Ermanovtyń «Aıtaqyn Bulǵaqov, Taldyqorǵan oblysy» degen qońyr úni áli qulaǵymda. Aıtaǵam shyǵyp «Háıláılimge» basqanda, boıymdy maqtanysh sezimi kerneıtin. Mundaı energetıka, mundaı qýat, mundaı máner Aıtaqyndy óz zamandastarynan daralap turatyn. Ol aıtyssúıer kórermenge órnekti óleń ǵana emes erekshe kóńil kúı, qýatty energetıka, shynaıy emosııa, aıshyqty ázil, estetıkalyq lázzat syılaıtyn. Aıtys kezinde eki qarsylas aqynnyń arasynda, aqyndar men qazylardyń, aqyndar men kórermenniń arasynda ornaıtyn kózge kórinbeıtin baılanys Aıtaqyn sııaqty qýaty mol aıtyskerler sahnaǵa shyqqanda anyq baıqalady.
Aıtaqynnyń qyzyq maqamy da, qyzyl shapany da, etigi men bórki de erekshe ótimdi, qazirgi tilmen aıtqanda «hıt» bolatyn. Toqsanynshy jyldardyń basyndaǵy júzdegen aıtyskerdiń ishinde on shaqty aqyn ǵana «topovyı» edi. Solardy biri emes, biregeıi – Aıtaqyn Bulǵaqov. О́ıtkeni jyldar jyljyp, zaman ózgergen saıyn, jańa tolqyn aqyndar legi, burynǵylardy tyqsyrmasa da, sahnadan birte-birte sıretip, aqyry olardy ardagerler retinde «zeınetke» shyǵaryp jiberdi. Al 90-jyldary Qonysbaı Ábilovpen aıtysqan Aıtaqyn Bulǵaqov bolsa, 2000 jyly Aıbek Qalıevpen, 2010 jyly Rınat Zaıytovpen, 2020 jyly Syrym Áýezhanmen aıtysyp áli sahnada júr. Iаǵnı alpysty alqymdasa da «trendte».
Tarıhta áke men bala bolyp aıtysqan Manap Kókenov pen Ábdikerim Manapovtardan keıin osy ákeli-balaly Aıtaqyn men Jandarbek Bulǵaqovtar. Bul aıtysty ǵylymı túrde taldap, kólemdi maqala jazýǵa bolady. Menińshe áziliniń árliligi, kótergen máselelerdiń aýqymdylyǵy, aqyndyq sheberligi men poetıkalyq kórkemdigi jaǵynan bul sóz saıysyn jalpy aıtys tarıhyndaǵy klassıkalyq úlgilerdiń qataryna jatqyzýǵa bolady.
Aıtaqynnyń aıtqanynan qaıtpaıtyn birbetkeıligi, dostyq pen sertke adaldyǵy, bastyq pen baı-baǵlanǵa jalpaqtamaıtyn týralyǵy, ómirdegi batyrlyǵy men sahnadaǵy batyldyǵy bólek áńgime.
Aldaǵy jyly qańtarda meniń Aıtash aǵam 63-ke tolady. Paıǵambardyń jasyna shyǵyp, kemeline kelgen kókemniń qazaq rýhanııatyna sińirgen eńbegi bılik tarapynan ádil baǵalanyp jatyr. Al halyqtyń tarapynan áldeqashan moıyndalǵan. «Háıláılimniń» eń áýelgi ıesin tanymaıtyn, qurmettemeıtin aıtyssúıer qazaq kemde-kem. Aıtaǵamdy Altaıdan Atyraýǵa, Tashkentten Orynborǵa deıingi kúlli qazaqtan bólek, Mońǵolııa, Qytaı, Qyrǵyzstan men Túrkııa, Eýropa men AQSh-qa deıingi dúnıe júziniń qazaǵy men qyrǵyzy tanıdy. Sol sebepti, 23 jeltoqsanda Jetisýdyń júregi Taldyqorǵan qalasynda «Aıtystyń Aıtaqyny» atty halyqaralyq aqyndar aıtysy ótpek. Osy sharanyń ótýine qoldaý bildirgen barlyq el azamattaryna alǵysymdy bildiremin. Rasynda, ol – bir óńirdiń ǵana tanymal tulǵasy emes, ózindik mektep qalyptastyra bilgen aıtys óneriniń Aıtaqyny!
Balǵynbek Imash,
aıtysker aqyn,
fılologııa ǵylymdarynyń kandıdaty
