UMAI syılyǵynyń saltanatty rásimin Mádenıet jáne sport mınıstri Dáýren Abaev ashyp, baıqaýdyń barlyq qatysýshysyn quttyqtap, óner salasynyń ókilderine úlken shyǵarmashylyq jolda jańa jetistikter tiledi. Jalpy 19 laýreat UMAI músinshesi men aqshalaı syılyqtarǵa ıe boldy.
«Elimizde tuńǵysh taǵaıyndalyp otyrǵan UMAI ulttyq syılyǵynyń jeńimpazdaryn, óner salasyndaǵy jyl úzdikterin anyqtaýǵa arnaıy jınalyp otyrmyz. «Umaı» ulttyq syılyǵy – sahna arqyly sanaǵa tóńkeris jasaıtyn, júrekterden izgilik izdeıtin naǵyz óner maıtalmandaryna arnalǵan. О́zderińiz bilesizder, kez kelgen adam kúndelikti kúıbeńnen ózin tek teatr, bı, sýret, mýzyka, ádebıet arqyly ǵana qutqarady. Sondyqtan bul premııanyń mańyzy biz oılaǵannan áldeqaıda tereńde dep sanaımyn. Barsha jeńimpazdardy shyn júrekten quttyqtaımyn!», dedi Dáýren Abaev.
Aıta keteıik, jeńimpazdardy komıssııa músheleri anyqtady. Barynsha ádil tórelik jasaý maqsatynda qazylar alqasynyń esimderi sońǵy sátke deıin qupııa bolyp qaldy.
Sonymen, syılyqtyń laýreattary:
«Teatr óneri» nomınasııasy boıynsha:
• «Opera óneri» – erler partııasynyń úzdik oryndaýshysy – «Astana Opera» jetekshi solısi Medet Shotabaev (Kavaradossı partııasy, «Toska», Dj. Pýchchını). Áıelder partııasynyń úzdik oryndaýshysy – «Astana Opera» jetekshi solısti Jupar Ǵabdýllına (Aıda partııasy, «Aıda», Dj. Verdı);
• «Akterlik sheberlik» – Úzdik er adam róli úshin syılyqty Ǵalymbek Ospanov aldy (Genrı Hıggınstiń róli, B.Shoýdyń «Meniń súıikti perishtem» pesasy boıynsha, rejısseri – A.Orazbekov, Muhtar Áýezov atyndaǵy Qazaq Ulttyq akademııalyq drama teatry). Úzdik áıel róli úshin syılyqty Olga Korjeva aldy (Marına Svetaevanyń róli, «ARS Amandi. Mahabbat óneri». Rejısseri - G. Efımova, N. Sas atyndaǵy balalar men jasóspirimderge arnalǵan memlekettik akademııalyq orys teatry);
• «Úzdik rejıssýra» – V.Shekspırdiń «Korol Lır» qoıylymy úshin Farhat Moldaǵalı. Ǵ. Músirepov atyndaǵy balalar men jasóspirimderge arnalǵan Qazaq memlekettik akademııalyq teatry;
• «Spektakldiń úzdik kórkemdik bezendirilýi» - Sofıa Tasmaǵambetova, Pavel Dragýnov. E. Rahmadıevtiń «Alpamys» operasy, «Astana Opera»memlekettik opera jáne balet teatry;
• «Úzdik mýzykalyq-dramalyq spektakl» - «Bórte» D. Isabekov. Túrkistan mýzykalyq-drama teatry.
Bes syılyq «Horeografııa óneri» nomınasııasynda anyqtaldy:
• «Úzdik bı ujymy» - «Aqqý» bı ansambli. Jetekshisi-Gúlnara Mambetova. «Ene tárbıesi» bıi. Ǵazıza Jubanova atyndaǵy Aqtóbe oblystyq fılarmonııasy;
• «Balettegi Úzdik oryndaýshy» – Úzdik solıst-Aınur Ábilǵazına, «Astana Balet» teatry. Úzdik solıst-Azamat Asqarov. Abaı atyndaǵy Qazaq Ulttyq akademııalyq opera jáne balet teatry;
• «Úzdik horeograf» - Muqaram Ábýbahrıeva, «Sultan Beıbarys» baleti. «Astana Balet» teatry.
• «Úzdik balet qoıylymy» - «Dala qońyraýy». 2 bólimnen turatyn balet, kompozıtorlar-Q. Shildebaev, R.Gaısın, T. Mombekov, K. Pıno-Kıntana. Kórkemdik jetekshisi - Altynaı Asylmuratova, «Astana Opera» memlekettik opera jáne balet teatry.
«Mýzykaly-oryndaýshylyq óner» nomınasııasynyń jeńimpazdary úsh marapatqa ıe boldy:
• «Úzdik dástúrli oryndaýshy» (án aıtý) – Dıas Murathan, «Alataý» dástúrli óner teatry (Almaty).
• «Úzdik dástúrli oryndaýshy» (aspapshy) – Janǵalı Júzbaı, Qazaq ulttyq óner ýnıversıteti (Astana).
• «Úzdik mýzykalyq ansambl» – DUET CLASSIC Ermek Qurmanaev / Anara Kamelınova. Jambyl atyndaǵy Qazaq memlekettik fılarmonııasy (Almaty), Qazaq ulttyq óner ýnıversıteti (Astana).
«Beıneleý jáne sándik-qoldanbaly óner» nomınasııasynda úsh syılyq tabystaldy:
• «Úzdik sándik-qoldanbaly óner týyndysy» úshin – Sáýle Bapanova. Kıizden jasalǵan kolleksııa. Temirbek Júrgenov atyndaǵy Qazaq ulttyq óner akademııasy;
• «Sýretshiniń / grafıktiń úzdik jumysy» -sýretshi Vıacheslav Lıý-Ko «Ýmaıdyń oralýy» (grafıka).
• «Zamanaýı ónerdegi úzdik joba» úshin – Sáken Narynov. «Altyn júrek» jobasy. Qazaqstan Respýblıkasy Sáýletshiler Odaǵy.
«Úzdik balalar spektakli úshin» arnaıy júldesin jarııalaý úshin jeńimpazdardyń esimi jazylǵan konvertti sımvoldyq túrde Balalar jylynda balalar sahnaǵa alyp shyqty jáne ashty. Aıta keteıik, Mádenıet jáne sport mınıstri Dáýren Abaevtyń qolynan úlken marapatqa Qazaq ulttyq horeografııa akademııasy Rıkardo Drıgonyń «Raýshan búrshigi men kóbelektiń romany» baleti úshin jáne Mańǵystaý oblystyq qýyrshaq teatry «Aıjan ájesiniń ertegisi» (Aıjan ájesiniń ertegileri), «Qaıta jańǵyrǵan órnek» (oıý-órnekti jandandyrǵan), «Dastarhan» trılogııalary úshin jeńip aldy.
«Bıyl biz mádenıet jáne óner salasyndaǵy kóptegen jobalardy iske asyrdyq. Umai-dan basqa, Dala Dauysy shyǵarmashylyq baıqaýy, «Shertpe kúı» dástúrli mýzyka festıvali, Roza Baǵlanova atyndaǵy vokalıster baıqaýy, Astana Piano Passion jas pıanıster baıqaýy, «Altyn dombyra» respýblıkalyq aıtysy, «Eýrazııa» kınofestıvali, «Aıboz» ádebı syılyǵy jáne basqa da jobalar. Bir sózben aıtqanda ultymyzdyń at ústindegi aıbyndy rýhyn kótergen, qalamgerlerimizdiń, óner ókilderiniń shabyttaryna shamshyraq bolǵan júıeli jumystar bir jyl ishinde ǵana atqaryldy.
Mınıstrliktiń basqa da salalaryna, ıaǵnı sport pen týrızmge qatysty qolǵa alynǵan is-sharalary da jeterlik. О́z kezeginde, osy irgeli isterdi birlesip atqarǵan barlyq áripteske aıryqsha alǵys bildirgim keledi. Kelesi jyly mundaı jobalar odan da kóp bolady», dep túıindedi Dáýren Abaev.
Aıta keteıik, úlken shoý-baǵdarlamaǵa deıin teatr foıesine sýret jáne eskızder kórmesi qoıyldy, al óner maıtalmandary qyzyl kilem ústinen júrip ótti.
