Prezıdent Qasym-Jomart Toqaev Almaty qalasynda ótip jatqan rapıd jáne blıs boıynsha erler men áıelder arasyndaǵy shahmattan álem chempıonatynyń ashylýyna oraı jarys qatysýshylaryna quttyqtaý joldady. Bul aıtýly sharaǵa qatysý úshin álemniń 50-den astam memleketinen eń úzdik sportshylar jınaldy.
«Qazaqstanda osy týrnırdi ótkizýge septigin tıgizgeni úshin Halyqaralyq shahmat federasııasynyń basshylyǵyna rızashylyǵymdy bildiremin. Mundaı bedeldi jarystar elimizde shahmattyń tanymaldylyǵyn arttyrýǵa tyń serpin bereri sózsiz. Búginde qazaqstandyq shahmatshylar balalar arasyndaǵy jáne eresekter arasyndaǵy Azııa jáne álem chempıonattarynda joǵary nátıjeler kórsetip keledi. Olardyń jetistigi óskeleń urpaqty ıntellektýaldy sport túrlerimen shuǵyldanýǵa, aldyna zor maqsattar qoıyp, oǵan qol jetkizýge jigerlendiredi.
Biz Qazaqstanda shahmatty júıeli túrde damytýdy jalǵastyramyz jáne Halyqaralyq shahmat federasııasymen yntymaqtastyqta tabysty jumys isteýge daıynbyz. Bul bizdiń adam áleýetin arttyrý jáne zııatker ult qalyptastyrý jónindegi strategııalyq mindetimizge tolyq saı keledi. Týrnır qatysýshylaryna jarystan umytylmas áser alyp, jarqyn jeńisterge jetýdi tileımin», dep jazylǵan Prezıdenttiń quttyqtaý hatynda.
