Depýtat Halyqaralyq qant dıabeti federasııasynyń málimeti boıynsha, ótken jyly álemde eresekterde 537 mln qant dıabeti syrqatynyń tirkelgenin atap ótti. Qazaqstanda bul kórsetkish shamamen 450 myń adamdy quraıdy. Onyń ishinde 5,5 myńǵa jýyǵy 17 jasqa deıingi balalar bolyp otyr.
«Elimizde aýyr dertke shaldyqqandar sany odan da kóp bolýy múmkin. Sebebi atalǵan dert kópke deıin belgi bermeıtindikten, naýqastardyń kóbisi asqynǵan kezde ǵana dárigerge júginedi. Árıne, bizdiń elimizde osyndaı naýqastar emdelý úshin ambýlatorııalyq deńgeıde qantty tómendetetin dárilik zattarmen, medısınalyq buıymdarmen qamtamasyz etiledi. Sonymen qatar búgingi tańda qant dıabeti – Qazaqstandaǵy eń qymbat áleýmettik mańyzy bar aýrýlardyń biri. Resmı aqparat boıynsha, naýqastardy dári-dármekpen qamtamasyz etý úshin bıyl 30 mlrd teńgege jýyq qarajat bólingen», dedi senator.
Depýtattyń aıtýynsha, el óńirlerinde endokrınolog-dárigerlerdiń jetispeýshiligi de ózekti másele bolyp otyr. Qazirgi kezde Qazaqstanda jeke sektorda jumys isteıtinderdi qosqanda 900-den astam osyndaı maman bar ekenin aıta ketken jón.
«Úkimet tarapynan joǵaryda aıtylǵan máselelerdi eskere otyryp, qant dıabetimen tıimdi kúresý úshin bastapqy profılaktıka men patologııany erte anyqtaýǵa baǵyttalǵan qant dıabeti boıynsha Ulttyq baǵdarlamasyn ázirleýdi suraımyn. Oǵan kelesi baǵyttardy qosýdy usynamyn: Qazaqstanda mamandandyrylǵan dıabettik kómek kórsetýdiń zamanaýı júıesin qurý; kórsetiletin kómektiń sapasyn arttyrý maqsatynda dıagnostıkanyń jáne emdeýdiń zamanaýı ádistemelerin engizý; elimizde qant dıabetiniń taralýyn dál baǵalaý maqsatynda qant dıabeti men skrınıngtiń jetildirilgen ulttyq tirkelimin paıdalaný; júktilik kezinde, ana men bala ólimin azaıtý úshin qant dıabetin ýaqytyly jáne der kezinde emdeý kerek. Sondaı-aq pasıentterge ózin-ózi baqylaý ádisterin úıretý maqsatynda qant dıabeti mektepterin, dıabettik taban, dıabettik retınopatııa kabınetterin arttyrý qajet», dedi senator.
