Arqalyq qalasy polısııa basqarmasynyń málimetinshe, búgin saǵat 14:03-te Arqalyq-Torǵaı tas jolynda bes avtokólik soqtyǵysqan.
«Aldymen «Taıota» kóligi «Nıssan» avtokóligimen soqtyǵysqan, sodan keıin taǵy úsh avtomobıldiń soqtyǵysýy oryn aldy», dedi polısııa basqarmasy bastyǵynyń mindetin atqarýshy Talǵat Balǵojın.
Nátıjesinde «Nıssan» júrgizýshisi oqıǵa ornynda kóz jumdy. Aldyn ala málimetter boıynsha, JKO saldarynan 9 adam zardap shekti, olardyń úsheýi jansaqtaý bóliminde jatyr.
Qazirgi ýaqytta sotqa deıingi tergeý júrgizilýde, qajetti saraptamalar taǵaıyndaldy.
