Bul «Jańa Qazaqstan» depýtattyq tobynyń saýalyna aýyzsha jaýap boldy. Otyrys Qańtar oqıǵasy kezinde qaza tapqandardy bir mınýt únsizdikpen eske alýmen bastaldy.
Májilis spıkeri Erlan Qoshanov óz sózinde depýtattarǵa Qańtar oqıǵasynyń bılikti basyp alýdyń muqııaq josparlanǵan áreketi ekenin anyq dáleldeıtin faktiler usynylǵanyn atap ótti.
Al ony uıymdastyrýshylar halyqty kózsiz qoldanyp, beıbit mıtıngilerdi paıdalanyp ketti.
«Bul, ashyǵyn aıtqanda, Táýelsizdikke jasalǵan qastandyq bolatyn! Biraq Prezıdentimizdiń erik-jigeriniń, halqymyzdyń aqyl-parasaty men birliginiń arqasynda, qatardaǵy polıseılerdiń, dárigerlerdiń, eriktilerdiń erligi arqyly biz memlekettigimizdi qorǵap, beıbereketsizdikke jol bermedik», dedi Erlan Qoshanov.
Májilis tóraǵasy Qańtar oqıǵasy týraly aqparatty qasaqana burmalaýǵa múddeli toptardyń el ishinde de, syrtynda da bar ekenin atap ótti.
«Birligimizdi buzǵysy keletin kúshter kóp. Bul týraly umytpaıyq. Endi halyq ádil qoǵam qurýdan úmitti. Bizdiń aldymyzda óte mańyzdy mindetter tur. Prezıdenttiń reformalarynyń tóńireginde bárimiz birigýimiz kerek», dedi Erlan Qoshanov.
Otyrys sońynda Májilis Tóraǵasy Qańtar oqıǵasynyń bolashaqta qaıtalanbaýy úshin sabaq alý mańyzdy ekenin atap ótti.
Jalpy otyrysta Bas prokýror, Ishki ister mınıstri, qoǵam belsendileri men Májilis depýtattary sóz sóıledi. Sonymen qatar bolǵan oqıǵalardyń bel ortasynda bolyp, sol kúnderdiń barlyq aýyrtpalyǵyn bastan ótkergen polısııa qyzmetkerleri, dárigerler, kásipkerler, eriktiler de pikirimen bólisti.
Qańtar oqıǵasynyń qaıtalanýyn boldyrmaý maqsatynda memleket tarapynan jasalyp jatqan sharalar týraly depýtattardyń saýaldaryna Úkimet músheleri jaýap berdi.
Jıyn respýblıkalyq telearnalar men ınternet arqyly kórsetildi.
Jalpy otyrys bastalmas buryn tergeý barysynda tabylǵan qarý-jaraqtarmen kórme uıymdastyryldy.
Sondaı-aq ótken jyldyń qańtaryndaǵy tártipsizdikter kezinde búlingen polıseılerdiń kıimderi – qalqandar, bas kıimder, oq ótkizbeıtin keýdesheler usynyldy.
