Bilim • 10 Qańtar, 2023

Coursera qazaqstandyq stýdentterge de qoljetimdi bolady

610 ret

kórsetildi

2 mın

oqý úshin

Qazaqstandyq stýdentterge Coursera kýrstary qoljetimdi bolady. Bul týraly Ǵylym jáne joǵary bilim mınıstri Saıasat Nurbek málimdedi, dep habarlaıdy Egemen.kz.

Botakóz BAQBERGEN

Coursera qazaqstandyq stýdentterge de qoljetimdi bolady

«AQSh-qa jumys saparym barysynda búgin Coursera ókili Jeff Maggioncalda myrzamen kezdesip, ortaq jobamyz boıynsha suraqtardy talqyladyq. Bul joba Qazaqstan Prezıdentiniń 2022 jylǵy qyrkúıekte Nıý-Iorkke sapary kezinde iske qosylǵan edi. Kezdesý barysynda eki jaqqa da tıimdi ýaǵdalastyqqa qol jetkizildi. Kelisim boıynsha baǵdarlamanyń birinshi kezeńi osy aıda bastalady. Coursera kýrstary 25 óńirlik ýnıversıtettegi 20 000 qazaqstandyq stýdentke qoljetimdi bolady», dep jazdy Saıasat Nurbek óziniń Facebook paraqshasynda.

Qazirgi ýaqytta jahandyq bilim berý platformasynyń 50 basym kýrsy qazaq jáne orys tilderinde qoljetimdi, olar baǵdarlamalaý jáne sıfrlandyrý, matematıka, fızıka, marketıng jáne basqa da salalardy qamtıdy. Basym kýrstardyń tizimine AQSh, Eýropa jáne Azııanyń jetekshi ýnıversıtetteriniń baǵdarlamalary kiretinin atap ótý kerek.

Mınıstr vedomstvo komandasy baǵdarlamany qazaq tiline lokalızasııalaı otyryp, 600 kýrsqa deıin keńeıtý boıynsha jumys istep jatqanyn jetkizdi. Aldaǵy úsh jylda 100 000 qazaqstandyq stýdent pen ózge de paıdalanýshylar Coursera platformasyna qol jetkize alady.

Vedomstvo basshysynyń aıtýynsha, qazirdiń ózinde Stanford University-de oqıtyn qazaqstandyq stýdentter platformanyń barlyq múmkindikterin belsendi paıdalanyp jatyr.

«Búgingi kezdesýde olardyń da pikirlerin suradym. Atalǵan platforma oqý josparlaryndaǵy olqylyqtardy toltyrýǵa jáne dıplomdyq baǵdarlamalardy eńbek naryǵymen tikeleı baılanystyrýǵa kómektesedi. Is júzinde bizdiń stýdentterge mansaptyq maqsattaryna jetýge múmkindik beredi. Coursera jobasy jumys berýshilerge de paıdaly bolmaq», dep túıindedi Saıasat Nurbek.