«Balalardyń damýy úshin sapaly tamaqtanýdyń mańyzy erekshe. Balalardy tamaqpen qamtamasyz etý standarttary qaıta qaralady. Onyń ishinde barlyq bastaýysh synyp oqýshylaryn bir rettik tegin ystyq tamaqpen qamtamasyz etý sondaı-aq ashanalarda qolma-qol aqshasyz esep júrgizý júıesin engizý josparlanyp otyr», dedi Ǵanı Beısembaev mınıstrlik alqasynyń otyrysynda.
Mınıstr 2022 jyly 136 myń oqýshyǵa arnalǵan 247 jańa mektep paıdalanýǵa berilgenin atap ótti. Mektepterdi jańǵyrtý jobasy boıynsha shaǵyn qalalar, aýdan ortalyqtary men aýyldardaǵy 421 mektepte ashanalar men 814 kitaphana jańartyldy. 475 mektepke 634 pán kabıneti satyp alyndy. Taǵy 264 mektepte kúrdeli jóndeý jumystary júrgizildi.
Vedomstvo basshysy shaǵyn qalalar men aýyldardaǵy mektepterdi jańǵyrtýdy, ınfraqurylymdy jáne jumys istep turǵan mektepterdegi qaýipsizdik deńgeıin jaqsartýdy jalǵastyrýǵa ýáde berdi.
