Bul týraly Premer-mınıstr Álıhan Smaıylovtyń qatysýymen ótken Indýstrııa jáne ınfraqurylymdyq damý mınıstrliginiń keńeıtilgen alqa otyrysynda vıse-mınıstr Erkebulan Daýylbaev aıtty.
Qazir barlyq qala men aýyldyq jerdi taza sýmen 100% qamtamasyz etý úshin «Ár eldi mekende taza sý» ulttyq jobasy ázirlenip jatqany belgili boldy.
«Osy jyly qala halqynyń 98,7%-yn jáne aýyl halqynyń 96%-yn sýmen jabdyqtaý qyzmetterimen qamtý josparlanyp otyr. Bul baǵyttaǵy jobalardy qarjylandyrý úshin respýblıkalyq bıýdjetten shamamen 172 mlrd teńge kóleminde aqsha qarastyrylyp otyr», dedi mınıstrdiń orynbasary.
Jergilikti atqarýshy organdardyń sońǵy derekterine sáıkes ár túrli qarjylandyrý kózderi esebinen shamamen 3 myń shaqyrymdaı jelige jańǵyrtý jumystary júrgizilgen. Tutastaı alǵanda, byltyr jelilerdiń jalpy tozýy 51% deńgeıinde baıqaldy. Prezıdent Qasym-Jomart Toqaevtyń saılaýaldy baǵdarlamasyna sáıkes 2023 jyly bul kórsetkishti 50%-ǵa deıin tómendetý kózdelgen.
Osy oraıda elimizdegi káriz-tazartý júıeleriniń qalypty jumys isteý máseleleri de IIDM-niń udaıy baqylaýynda ekenin atap ótken jón. Aıtalyq, qazir respýblıkadaǵy 89 qalanyń 27-de káriz-tazartý qurylymdary qarastyrylmaǵan. Al 41 qalada tıisti nysandardyń tozýy 60%-dan astam. Osyǵan baılanysty atalǵan nysandardy jańǵyrtyp, jóndeý úshin qarjylandyrý mehanızmderi de ázirlengenin aıta keteıik.
