Jylytý qazandyǵynan órt shyqty degendi estı sala oqıǵa ornyna bardyq. О́rt sóndirýshiler tańǵy saǵat 6.54-te shyqqan tilsiz jaýdy aýyzdyqtap, asaı-múseılerin jınastyryp jatyr eken. Kómir sehy tolyqtaı otqa oranǵan. Demek qazandyqqa kómir jetkizilý jaǵynan problema týyndaıdy. Bul tyǵyryqtan shyǵý úshin qazandyq jumysy ýaqytsha mazýtqa kóshiriledi. Ol týraly apat bolǵan jerge kelgen oblys ákimi Danıal Ahmetov aıtyp berdi. Aımaq basshysy, qazirgi jaǵdaı boıynsha ǵana emes, jalpy jylytý elektr qazandyǵynyń máselesin túbegeıli sheshý jolyn da aıtty.
– Jylytý qazandyǵynda oryn alǵan órt sóndirildi. Jaǵdaıdy baqylaýda ustap otyramyz. Birinshi qıynshylyq – kómirdi qazannyń basyna apara almaımyz. Másele qaýipti emes. Eki saǵat ishinde istep turǵan tórt qazandyq mazýtqa kóshiriledi. Qazirgi tańda 380 tonna mazýt bar. 960 tonna mazýt jetkiziledi. Táýligine 240 tonna mazýt paıdalanylady. Demek bes kúnniń qory bar. Al órtengen seh úsh kún ishinde qalpyna keltiriledi, – dedi aımaq basshysy.
Sonymen qatar D.Ahmetov jylytý elektr qazandyǵy basshylyǵynyń jaýapsyzdyǵyn, salǵyrttyǵyn synǵa alyp otyr. Aıtýynsha, qazandyqtyń Qarajyra kómir kenishine 2 mlrd 350 mln teńge qaryzy bar. Qazandyq ókilderi
6 qarashadaǵy jaǵdaıdan beri máseleni sheshý úshin eshqandaı áreket jasamaǵan kórinedi. Mazýt memlekettik kepildikpen ǵana jetkizilip otyr. Esterińizge sala ketsek, 6 qarashada qazandyqtyń beseýi birdeı isten shyǵyp, qalada tótenshe jaǵdaı jarııalanǵan edi. Sodan beri keıbir turǵyn úılerde qalypty temperatýra saqtalyp turǵan. Degenmen jylýǵa zárý turǵyndar da az emes.
– Úıimiz sýyq. Biraq shydap, qystan shyǵyp kelemiz. Jylý úshin tólemdi ýaqtyly tólep otyrmyz. Másele túbegeıli qashan sheshiledi, bilmeımiz, – deıdi kópqabatty úıdiń turǵyny Máýlııa Dónenbaeva.
Iá, bıylǵy qystan jylytý qazandyǵy áýpirimdep shyǵatyn shyǵar. Alaıda másele jylda qaıtalanbaýy úshin ne istemek kerek?! Bul suraqty oblys basshysyna qoıdyq. Danıal Ahmetovtiń pikirine qaraǵanda, másele túbegeıli sheshilýi úshin qazandyq tolyǵymen kommýnaldyq menshikke ótýi kerek. Eger memleket menshigine beriletin bolsa, qazandyqtyń qaryzy da jabylatyn kórinedi.
– Qazandyqty kommýnaldyq menshike berý kerek degen usynysty Úkimetke jetkizemiz. Biraq bul jumys zań aıasynda atqarylýǵa tıis. Qazir prokýratýra ókilderi osy baǵyt boıynsha jumys atqaryp jatyr, – dedi oblys ákimi.
Shyǵys Qazaqstan oblysy,
Rıdder qalasy
