Jeksenbidegi jarys Qazaqstannyń jankúıerleri úshin kóńilsizdeý bastaldy. 50 kılo salmaqtaǵy Móldir Toıkova Ngýen Ngok Trannan oısyraı utyldy. Vetnam boksshysy birinshi jáne ekinshi raýndtarda jerlesimizdi nokdaýnǵa jiberip, tóreshi sońǵy kezeńde jekpe-jekti toqtatýǵa májbúr boldy. 54 kılodaǵy Ánel Saqysh ózbekstandyq Nıgına Ýktamovamen qolǵap túıistirdi. Ýktamova byltyr Polshanyń Kels qalasynda ótken álem birinshiliginde bas júldeni oljalaǵan bolatyn. Qazir de ol naǵyz babynda eken. Báseke barysynda Áneldi eki ret eseńgiretken Nıgına esh kedergisiz fınalǵa shyqty. Kóp keshikpeı 57 kılo salmaq dárejesindegi Vıktorııa Grafeeva taǵy bir ózbek qyzy, Azııa chempıony Sıtora Turdybekovamen saıysqa tústi. Bul báseke de kórshilerimizdiń paıdasyna sheshildi.
Taılandtyq Porntıp Býapamen aıqasqan 60 kılo salmaqtaǵy Shahnaz Isaeva tipten dármensiz kórindi. Qarsylasy ony jaqsylap turyp sabap, ekinshi raýndta nokaýtqa jiberdi. 63 kılodaǵy Nazerke Serik te el senimin aqtamady. Ol mońǵolııalyq Ganzorıg Badmaaragke laıyqty qarsylyq kórsete almady. 66 kılo salmaqtaǵy О́zbekstan men Qazaqstannyń ózara tartysy taǵy da alǵashqylardyń paıdasyna sheshildi. Bul joly Aqnar Ishanovanyń Naıbahor Hamıdovaǵa shamasy jetpedi.
Alty boksshymyz utylǵan soń baryp qana qazaq qyzdary ózderiniń alǵashqy jeńisine qol jetkizdi. 70 kılo salmaqtaǵy Jasmın Qızatova vetnamdyq Trýong Mın Thý Kıýnhty úshinshi raýndta tehnıkalyq nokaýtpen jeńdi. О́kinishke qaraı, Jasmınniń jeńisti jolyn Dana Dıdaı jalǵastyra almady. 75 kıloda synǵa túsken ol taılandtyq Manıkon Baısonnan ońbaı taıaq jedi. Qarsylasy ony úsh ret nokdaýnǵa jiberdi. Dananyń murnynan qan ketkennen keıin tóreshi básekeni merziminen buryn toqtatty. Eń sońǵy bolyp 81 kılo salmaqta Gúlsaıa Erjan rıngke kóterildi. Ol Nepal boksshysy Jebegý Trıshany esh qınalmaı utty. Sóıtip, jartylaı fınalǵa shyqqan toǵyz burymdymyzdyń tek ekeýi ǵana aqtyq synǵa joldama aldy. Árıne, bul jaǵdaı elimizde qyzdar boksy turalap qalǵanyn kórsetedi.
Keshe erler jartylaı fınaldyq básekelerin ótkizdi. Bul mejede bizdiń boksshylar myna qarsylastarymen kúsh synasty: Sanjar Táshkenbaı (48 kılo) Natthaphong Thýamcharoen (Taıland), Nursultan Altynbek (54 kılo) Islam Torobaev (Qyrǵyzstan), Mahmud Sabyrhan (57 kılo) Djerıcho Akaılar (Fılıppıny), Talǵat Syrymbetov (60 kılo) Phýthanet Rodsýk (Taıland), Muhammedsabyr Bazarbaıuly (63,5 kılo) Týlga Oıýnbaatar (Mońǵolııa), Abzal Serik (67 kılo) Penh Vanthýng (Kambodja), Sabyrjan Aqqalykov (71 kılo) Dovýd Mahkamov (Tájikstan), Dıas Moljigitov (75 kılo) Aılıkýtı Kahaer (Qytaı), Erasyl Jaqpekov (80 kılo) Jasýrbek Iýldoshev (О́zbekstan), Erhat Bekzat (92 kılo) Nýsratbek Tohırov (О́zbekstan) jáne Amanat Sabyrǵalı (+92 kılo) Jahongır Zokırov (О́zbekstan). Bul jekpe-jekterdiń qalaı aıaqtalǵany jaıynda gazetimizdiń kelesi sanynda egjeı-tegjeıli baıandaıtyn bolamyz.
