«2021 jyly túlekterdiń jalpy sany 81 393 adamdy qurady. Reıtıng obektıvti aqparatqa negizdelgen. Biz barlyq túlekterdi zeınetaqy aýdarymdarynyń bolýyna qaraı taldaımyz. Bul obektıvti krıterıı, sondyqtan reıtıng barynsha shynaıy dep aıtýǵa bolady», dedi «Atameken» ulttyq kásipkerler palatasynyń basqarýshy dırektory Azamat Beısenbenov.
Taldaý málimetteri boıynsha, 9,2 myńnan astam túlek magıstratýrada oqýyn jalǵastyrdy, 3,7 myńǵa jýyǵy bala kútimi boıynsha demalysqa ketti, 254 túlek oqýdy bitirgennen keıin ásker qataryna qosyldy.
Spıkerdiń aıtýynsha, JOO túlekteriniń jumysqa ornalasý kórsetkishi jyldan jylǵa artyp keledi. Bıylǵy jyly jumysqa ornalasýdyń ortasha paıyzy 79%-dy qurady. Qolǵa dıplom alǵan sátten bastap 12 kúntizbelik aı ishinde jumysqa ornalasqan túlekterdiń 67%-y turaqty zeınetaqy jarnalaryn aýdaryp otyrady, taǵy 12%-y shartty jumyspen qamtylǵan.
