Senatta múgedektigi bar adamdardyń aqparatqa qol jetkizý máseleleri talqylandy

Senat depýtaty Lázzat Qaltaeva azamattardyń ótinishterine, onyń ishinde kórý qabiletiniń buzylýyna baılanysty, memlekettik organdar saıttarynyń, sondaı-aq mobıldi qosymshalardyń jáne ómirdiń túrli salalaryndaǵy basqa da qyzmetterdiń qoljetimsizdigi máseleleri boıynsha otyrysty uıymdastyrǵan bolatyn.

Shara barysynda múgedektigi bar adamdarǵa aqparattyń qoljetimdiligi máseleleri egjeı-tegjeıli talqylandy.

«Buǵan deıin múgedektigi bar adamdarǵa sıfrlyq tehnologııalar men aqparattyń qoljetimdiligi taqyryby týraly depýtattyq saýal joldaǵan edim. Berilgen jaýapta ýákiletti organdar bul salada jumystar júrgizilip jatqanyn, alaıda biraz ýaqyt ótse de ókinishke qaraı nátıje joq ekenin atap ótti», dedi senator Lázzat Qaltaeva.

Lázzat Qaltaeva óziniń depýtattyq saýalynda memlekettik organdardyń saıttary, birqatar elektrondyq qyzmetter: jedelhat-bottar, baǵdarlamalyq jáne mobıldi qosymshalar – múgedektigi bar adamdarǵa qol jetkizý múmkin emes ekenin atap ótti.

Senatordyń aıtýynsha, osyǵan baılanysty múgedek adamdardy aqparatpen, sıfrlyq resýrstarmen jáne servıstermen qamtamasyz etýdiń qoldanystaǵy standarttaryn qaıta qaraý qajettigi týyndap otyr.

Ýákiletti memlekettik organdardyń ókilderi depýtattardyń suraqtaryna jaýap bere kelip, júrgizilip jatqan jumystar týraly senatorlarǵa aıtyp berdi jáne Qazaqstannyń zańnamasy men ulttyq standarttarǵa ózgerister engizý máselesine toqtaldy.

Otyrysqa Eńbek jáne halyqty áleýmettik qorǵaý, Sıfrlyq damý, ınnovasııalar jáne aeroǵarysh ónerkásibi, Saýda jáne ıntegrasııa jáne Aqparat jáne qoǵamdyq damý mınıstrlikteriniń ókilderi qatysty.