Rybakına taǵy da sheberligin moıyndatty

Elena Rybakınanyń Melbýrndegi jarystaǵy minsiz ónerine tamsanbaǵan jankúıer joq-aý, sirá! Jasyl qurlyqta ol nebir ataqty tennısshilerdi jolynan yǵystyryp, bas júlde úshin talasý múmkindigine ıe boldy. Jerlesimiz bastapqy eki básekede ortańqol oıynshylar – ıtalııalyq Elızabetta Kochchıaretto (7:5, 6:3) men slovenııalyq Kaııý Iývannan (6:2, 6:1) ymbas tústi. Al odan keıin Rybanykınń joly kil myqtylarmen túıisti. Úshinshi aınylymda ol úzdikter tiziminde 11-orynǵa turaqtaǵan amerıkanyq Danıel Kollınzdi (6:2, 5:7, 6:2) qapy qaldyrdy. Tórtinshi kezeńde álemniń birinshi raketkasy, 2020 jáne 2022 jyldary Rolan Garrosta top jaryp, byltyr US Open dodasynda bas júldeni oljalaǵan polshalyq Iga Shventekti eki sette (6:4, 6:4) shań qaptyr . Shırek fınala latvııalyq Elena Ostapenkodan (6:2, 6:4) basym tústi.

Jartylaı fınalda Elenanyń joly Vık­torııa Azarenkomen qıys­ty. Be­larýs­tyń 33 jastaǵy betke us­tar­lary­nyń biri osydan 10 jyl buryn álemdik reıtıngte kósh bastaǵan. Sol kezderi ol qatarynan eki ret Australian Open týrnırinde aldyna jan salmaı, 2012, 2013, 2020 jyldary AQSh-tyń ashyq birinshiliginiń fınalynda óner kórsetti. Eki ret Ýımbldonnyń jáne bir márte Rolan Garrostyń jartylaı fınalynda kúsh synas­ty. WTA týrnırlerinde 21 ret top jardy. Sonymen qatar Aza­renko juptyq básekede de jaqsy oınaıdy. Ol «Úlken dýlyǵa» sanatyndaǵy tórt týr­nırdiń úsheýiniń fına­lynda kúsh synas­ty. Vıktorııanyń qor­jy­nynda Olımpııa oıyndarynyń da júldesi bar. 2012 jyly Londondaǵy jarystyń jekele­ı básekesinde qola medal ıelense, mıkste Maksım Mırnyımen birge altynnan alqa taqty. Desek te Azarenkodaı azýly oıyn­shynyń ózi jerlesimizdiń qarqynyna shy­daı almady. Bul báseke 7:6, 6:3 esebimen aıaqtaldy.

Fınalda jolyqqan Arına Sobolenko­nyń da baǵyndyrǵan belesteri bir tóbe. Ol – WTA týrnırleriniń 11 dúrkin je­ńim­pazy, US Open men Ýımbldonnyń jar­tylaı fınalynda oınady. Juptyq saıysta Melbýrn men Nıý-Iorktegi doda­larda dara shyqty. Byltyr AQSh-tyń Fort-Ýert qalasynda uıym­dasty­rylǵan qorytyndy týrnırde fınalǵa deıin alqynbaı jetti. Bul joly bas júlde úshin tartystyń alǵashqy seti Rybakınanyń paıdasyna sheshilgenimen, qalǵan ekeýinde Sobolenkonyń mysy basym boldy. Atalǵan match 2 saǵat 29 mınýtqa sozyldy. Osylaısha, 24 jastaǵy Mınskiniń týmasy «Úlken dýylǵa» sanatyndaǵy týrnırde alǵashqy jeńisine qol jetkizdi.

Sheshýshi tusta utylsa da, Elena Ry­bakınaǵa da esh ókpe aıta almaımyz. Onyń óneri kópshiliktiń kóńilinen shyq­qany anyq. Elimizdiń birinshi raketkasy Aýstralııanyń ashyq birinshiligine naǵyz babynda kelgen eken. Maıtalman mamandar men saqa sarapshylar ony birden baıqady. Eń birinshi kezekte, olar Qazaqstan tennısshisiniń fýnksıonaldyq daıarlyǵynyń óte joǵary deńgeıde ekenin atap ótti. Oǵan esh kúmán joq. Bir ǵana mysal, fınalǵa deıingi alty kezdesýdiń beseýinde jeńiske jetý úshin Elenaǵa nebári eki set jetkilikti boldy. Iаǵnı Mel­­­býrnde otandasymyz bes birdeı qarsy­­lasyn 2:0 esebimen qapy qaldyrdy. Tek Kollınzge ǵana bir sette ese jiberdi. Sondaı-aq Kochchıarettoǵa qarsy oıynda jer­lesimizdiń baǵyttaǵan doby saǵatyna 195 shaqyrymdyq jyldamdyqpen júıt­kidi. Bul – Australian Open týrnıriniń rekordy! Jáne de osy týrnırdegi tabysynan keıin Rybakına álemdegi TOP-10 tennısshiniń qataryna qosyldy. Buǵan deıin Qazaqstannyń birde-bir ókili osyndaı bıikten kóringen joq edi.

Bıyl Melbýrndegi týrnırde birneshe tosyn nátıjelerdiń tirkelgenin de aıta ketken abzal. Máselen, osy jarystyń byl­­tyrǵy jeńimpazy, «Úlken dýlyǵa» sanatyndaǵy týrnırlerdi 22 ret utqan rekordshy Rafael Nadal ekinshi kezeńde AQSh-tyń 11-shi jáne álemniń 65-shi raketkasy Makkenzı Makdonaldtan jeńi­ledi dep eshkim oılaǵan joq edi. Biraq dań­qy jer jarǵan jampozdyń 27 jastaǵy ortań­qol oıynshyǵa áli jetpedi. Bul – osy jarystyń basty sensasııasy! Makdonald ta uzaq­qa shappady. Kelesi aınalymda ol japonııalyq Iosıhıto Nısıokaǵa jol ber­di. Byltyr ǵana álem­dik reıtıngte kósh bastap, qazirgi kezde segizinshi satyǵa jaı­ǵasqan reseılik Danııl Medvedev úshinshi kezdesýinde amerıkalyq Sebastıan Kordaǵa ese jiberdi. Álemniń úshinshi raketkasy Kasper Rýýdtyń da asyǵy alshysynan túspedi. Norvegııanyń maqtanyshy ekinshi kezeńde AQSh-tyń taǵy bir ókili Djenson Brýksbıden aılasyn asyra almady.

Áıelder saıysynda mysyrlyq Ons Jaber men grekııalyq Marııa Sakkarı syndy óte myqty tennısshilerdiń ekinshi jáne úshinshi aınalymdardan asa almaýy da kópshiliktiń tańdanysyn týdyrdy. Olardyń esimderi kópshilikke beımálim oıynshylardan utylýy da tosyn nátıje retinde tirkeldi. Osylaı tizbekteı bersek, Australian Open týrnırinde sensasıonnyeń kóp bolǵanyn baıqaımyz.

Al Elena Rybakınanyń jeńisti joly jalǵasady dep úmittenemiz.