Aımaqtar • 30 Qańtar, 2023

Almatyda JEO-2-ni gazǵa aýystyrý jobasy talqylandy

Almaty JEO-2-ni gazǵa aýystyrý jobasy boıynsha 2023 jyldyń aqpan aıynda jańa bý-gaz qondyrǵysyn salýǵa arnalǵan tenderdiń birinshi kezeńiniń qorytyndysy shyǵarylatyn bolady. Osy jyly stansııada merdiger anyqtalyp, qurylys-montaj jumystary bastalady. 2025 jyly jıyntyq qýaty 543,6 MVt bolatyn eki bý-gaz qondyrǵysyn iske qosý arqyly Almaty JEO-3-ti qaıta jańartý aıaqtalady, dep jazady Egemen.kz «Samuryq-Energo» AQ Baspasóz qyzmeti taratqan derekke silteme jasap.

Gúlbarshyn AITJANBAIQYZY

2023 jylǵy jeltoqsanda Ekibastuz GRES-1-de qýaty 500 MVt qalpyna keltirilgen №1 energııa blogyn paıdalanýǵa berý josparlanyp otyr jáne eki jańa energııa blogyn ornatý arqyly Ekibastuz GRES-2-ni keńeıtý boıynsha jumystar jalǵasady. Ekibastuz GRES-3 qurylysy boıynsha jobalaý aldyndaǵy is-sharalar bastaldy.

Energetıka salasyndaǵy asa mańyzdy jobalardy iske asyrý «Samuryq-Qazyna» Basqarma Tóraǵasy Almasadam Sátqalıevtiń «Samuryq-Energo» AQ Almaty energokesheniniń kásiporyndaryna jumys sapary barysynda Almaty qalasynda ótken keńestiń talqylaý taqyrybyna aınaldy.

Qor basshysynyń aıtýynsha, energetıka - el ekonomıkasyn damytýdyń negizgi faktory, ol erkin energetıkalyq qýatsyz Qazaqstan ındýstrııany da, ekonomıkanyń basqa mańyzdy sektorlaryn da damyta almaıdy.

Keńes barysynda «Samuryq-Energo» AQ kompanııalar tobynyń – «Almaty elektr stansııalary» AQ jáne «Alataý Jaryq Kompanııasy» AQ basshylary qazirgi kezde óńirde júzege asyrylyp jatqan birneshe jobalardy keńinen tanystyrdy. Budan basqa, Almaty JEO-2 jáne JEO-3 úshin syrtqy gaz ınfraqurylymy qurylysynyń barysy týraly «QazaqGaz» UK» AQ ókilderi baıandady.

«Samuryq-Energo» AQ basshysy Serik Tútebaevtyń aıtýynsha, elimizdiń energetıkasyndaǵy negizgi ınfraqurylymdyq jobalar Ekibastuz ben Almaty energokeshenderinde júzege asyrylyp jatyr. Birqatar jańa nysandar qazirdiń ózinde paıdalanýǵa berildi, basqalary boıynsha iske asyrý merzimi 2030 jylǵa deıingi kezeńge boljanyp otyr, onyń ishinde:

Jańa elektr súzgilerin ornata otyryp, GRES-1-de №1 energııa blogyn qalpyna keltirý. Joba stansııanyń qýatyn jobalanǵan 4000 MVt-ǵa deıin arttyrady. Qurylys-montajdaý jumystaryn aıaqtaý jáne blokty paıdalanýǵa berý 2023 jyldyń jeltoqsanyna josparlanyp otyr.
№3 energııa blogyn ornatý arqyly Ekibastuz GRES-2-ni keńeıtý jáne rekonstrýksııalaý. Jańa energııa blogynyń qurylysy stansııanyń belgilengen qýatyn 636 MVt-ǵa ulǵaıtýǵa múmkindik beredi jáne jylyna qosymsha 4,8 mlrd kVtsaǵ energııa óndirýdi qamtamasyz etedi. Iske asyrý merzimi - 2026 jylǵa deıin.
№4 energııa blogyn ornatý arqyly Ekibastuz GRES-2-ni keńeıtý jáne rekonstrýksııalaý. Joba stansııanyń belgilengen qýatyn 636 MVt-ǵa ulǵaıtýǵa jáne jylyna qosymsha 4,8 mlrd kVtsaǵ óndirýdi qamtamasyz etýge múmkindik beredi. Iske asyrý merzimi - 2027 jyl;
№5 jáne № 6 energııa bloktaryn ornatý arqyly Ekibastuz GRES-2-ni keńeıtý jáne rekonstrýksııalaý, 2029-2030 jj.;
Ekibastuz GRES-3-ti salý. Qolda bar ınfraqurylymdy paıdalana otyryp jáne qorshaǵan ortaǵa lastaýshy shyǵaryndylardy azaıtý úshin jańa tehnologııalardy qoldaný arqyly parametrleri joǵary 1200 MVt jańa stansııanyń jobasy. Iske asyrý merzimi - 2028-2029 jj;
Almaty qalasy men Almaty oblysynyń kabeldik jelilerin rekonstrýksııalaý. Jobany aıaqtaý kabeldik jelilerdegi shyǵynnyń azaıýyna jáne apattyq isten shyǵýdyń qysqarýyna ákeledi. Jobany kezeń-kezeńmen iske asyrý 2030 jylǵa deıin kózdelgen;
Shelek energııa torabynyń jelilerin damytý. Almaty oblysy jańartylatyn energııa kózderin damytýda úlken áleýetke ıe. Bul joba óńirdiń JEK obektilerin salýda óńirdiń áleýetin paıdalaný úshin Shelek energııa torabynyń jelilik sharýashylyǵynyń ótkizý qabiletin arttyrýǵa múmkindik beredi. 2025 jyl;
Ile ózeninde qarsy rettegish Kerbulaq SES-in salý. Jobany iske asyrý Qapshaǵaı SES-iniń rettegish qýatyn 80-nen 150 MVt-ǵa deıin arttyrýǵa múmkindik beredi. 2026 jyl;
Qorshaǵan ortaǵa áserin barynsha azaıta otyryp, Almaty JEO-2-ni jańǵyrtý. Eski alańda jańa stansııa salý JEO-2-ni tabıǵı gaz jaǵýǵa kóshirý esebinen Almaty qalasynyń ekologııalyq jaǵdaıyna teris áserdi azaıtýǵa múmkindik beredi. Qazirgi kezde ashyq eki satyly halyqaralyq tender jarııalandy. EQDB-men jobany qarjylandyrý týraly Kredıttik kelisimge qol qoıyldy. Sáýirde ADB-men jáne QDB-men kredıttik kelisimderge qol qoıý josparlanyp otyr. 2026 jyl;
Stansııanyń qýatyn 544 MVt-ǵa deıin ulǵaıtý arqyly BGQ negizinde Almaty JEO-3-ti qaıta jańartý. Joba Qazaqstannyń ońtústik aımaǵyndaǵy manevrlik qýattardyń tapshylyǵyn ishinara jabý úshin stansııada bý-gaz jabdyǵyn ornatýdy kózdeıdi, sol arqyly óńirde JEK-ti damytýǵa serpin beredi. 2025 jyl;
«Qaskeleń» QS ATQ-ǵa qosylý arqyly «Kókózek» qosalqy stansııasyn salý. Bul jobany iske asyrý Almaty oblysy Qarasaı aýdanynyń ındýstrııalyq aımaǵyn damytýdy qamtamasyz etýge múmkindik beredi. 2023 jyl.

Keńeste tehnologııalyq, rásimdik jáne qarjylyq aspektilerden bólek problemalyq máseleler men olardy sheshý joldary talqylandy. Keńes qorytyndysy boıynsha Qor basshysy qysqa merzimde oryndaý úshin birqatar tapsyrmalar berdi.