Rybakınanyń jarqyn jeńisi osy sport túrin serik etkenderdi jigerlendirýge tıis

Sulý da, symbatty Elenaǵa deıin Qazaqstannyń birde-bir tennısshisi esh­ýaqytta «Úlken dýlyǵa» sanatynda­ǵy týrnırlerdiń jekelegen saıysynda jartylaı fınalǵa deıin jetken emes. Túrli dúbirli dodalarda Iаroslava Shvedova, Iýlııa Pýtınseva jáne Elena Rybakınanyń birneshe márte shırek fınalda óner kórsetkeni esimizde. Mine, eń úzdik nátıjemiz osy ǵana edi. Shyny kerek, byltyrǵy maýsymǵa deıin alysqa «shaba almadyq». Sol seńdi Rybakına buzdy. 1999 jyldyń 17 maýsymynda Máskeýde dúnıege kelgen ol áý basta jas­óspirimder men jastar arasyndaǵy jarystarda ózin jaqsy qyrynan kórsetti. 2015 jyly eresekterdiń dýyna qosyldy. Biraq Elenanyń joly birden ońǵaryla qoımady. Reseı tennıs federasııasy ­tarapynan qajetti jaǵdaı jasalyp, tıisti qamqorlyq kórsetilmegennen ke­ıin Rybakına 2018 jyly Qazaqstannyń azamattyǵyn alýǵa nıet bildirdi. Ol biz­diń elge kelgennen keıin ǵana ózin myq­ty tennısshi retinde moıyndata bas­tady. Sózimiz dáleldi bolý úshin myna derekterge nazar aýdaraıyq: 2017 jyl­dyń sońynda WTA reıtınginde Elena 425-oryndy qanaǵat tutty. Ol kezde ten­nısshi Reseıdiń namysyn qorǵap júrgen. Qazaq eline qonys aýdarǵan soń birden 243 satyǵa joǵarylap, 182-orynǵa turaqtady. Sodan keıin-aq onyń tasy órge domalady. 2019 jyly 37, 2020 jyly 19-oryndardy ıelendi. 2021 jyldyń sońynda úzdikter tiziminde 14-satyǵa jaıǵasty. Byltyrǵy maýsymdy ol 22-orynmen qo­rytyndylady. Al kúni keshe ǵana otanda­symyz TOP-10 oıynshynyń qataryna qosyldy. Mine, progress dep osyny aıt!

Qazaqstannyń namysyn qorǵaǵan bes jylǵa jýyq ýaqyt aralyǵynda Ryba­kınanyń sporttyq mansabynda jar­qyn jeńister az bolǵan joq. Ol WTA týr­nırlerin úsh ret utyp, birneshe ret fınalda oınady. Byltyr Ýımbldon dodasynda dara shyqty. «Úlken dýlyǵa» sanatyndaǵy jarystardyń júlde qory óte qomaqty ekeni barshaǵa málim. Byltyr Londondaǵy jarysta ol 40 350 000 fýnt sterlıngti qurady. Jekelegen saıysta bas júldeni oljalaǵan oıynshylar ­2 mıl­lıonǵa ıelik etti. Sol somanyń qo­maqty bir bóligin Elena Qazaqstannyń jastar tennısiniń damýyna jumsap, halyqtyń aq alǵysyna bólendi.

Kúni keshe ǵana aıaqtalǵan Aýstra­lııanyń ashyq birinshiliginiń júlde qory 51 384 291 AQSh dollaryn qurady. Fınal­ǵa shyqqany úshin otandasymyzdyń esepshotyna 1 120 000 dollar aýdaryldy. Melbýrnde reseılik Anastasııa Pav­lıýchenkova ekeýi juptyq básekede úshin­shi kezeńge deıin jetti. Sol úshin ol taǵy
46 408 dollardy óz ámııanyna saldy. Mine, úlde men búldege orandy degen osy emes pe?!

Elena Rybakınaǵa deıin «Úlken dý­lyǵa» týrnırleriniń jekelegen saıysynda birde-bir jerlesimizdiń shırek fınaldyq mejeden asa almaǵany jaıyn­da joǵaryda aıttyq. Desek te juptyq básekelerde aýyz toltyryp aıtarlyq­taı tabystarǵa qol jetkizgenimizge esh­kimniń shúbá keltirmesi anyq. Máselen Iаroslava Shvedova amerıkalyq Vanıa Kıngpen birge 2010 jyly US open jáne Ýımbldonda barlyq qarsylasyn sypyra utyp, bas júldeni oljalady. 2015 jyly aýstralııalyq Keısı Dellakva ekeýi Rolan Garrostyń fınalynda kúsh synasty. 2021 jyly Parıjde Andreı Golýbev pen Aleksandr Býblık juby aqtyq synǵa deıin alqynbaı jetti. Eli­mizdiń qos myqty tennısshisi nebir dúl­dúlderdi jolynan yǵystyrdy. Alaı­da sheshýshi tusta olar fransııalyq Nıkolıa Maıý men Per-Iýg Erberge ese jiberip, Rolan Garrosty ekinshi oryn­­men qorytyndylady. 2020 jyly Aleksandr Býblık pen Mıhaıl Kýkýshkın Aýstralııanyń ashyq birinshiliginiń jartylaı fınalynda oınady.

Sóz oraıy kelgende, Qazaqstanǵa qa­tysy bar taǵy birneshe tennısshi ja­ıynda aıta ketsek, esh aıyby joq dep oılaımyz. Solardyń arasynan Elena Lıhovsevany bóle-jara atap ótýge bolady. 1975 jyly Almatyda dúnıege kelgen ol 20 jasyna deıin Qazaqstannyń týy astynda óner kórsetti. Sodan keıin Reseıge qonys aýdardy. Sol eldiń namysyn qorǵaǵan kezde mıks­te «Úlken dýlyǵa» dodalarynyń eki dúrkin jeńimpazy, juptyq saıysta tórt dúrkin fınalısi atanyp, jekelegen básekede Rolan Garrosta úzdik tórttiktiń qatarynan kórindi. 1999 jyldyń kúzinde ol TOP-15 oıynshynyń sanatyna qo­syldy. Tanymal tennısshiler arasynan bol­garııalyq Sesıl Karatancheva men reseılik Ksenııa Pervak ta birer jyl Qazaqstannyń atynan túrli jarysta baq synady. Alaıda bul oıynshylar eldi eleń etkizetindeı tabystarǵa qol jetkize alǵan joq.

Sonymen, qazirgi kezdegi jańartylǵan álemdik reıtıngte jerlesterimiz mynadaı oryndardy ıelenip otyr: ATR: Aleksandr Býblık – 36 oryn, Tımofeı Skatov – 129, Mıhaıl Kýkýshkın – 214, Beıbit Juqaev – 305, Denıs Evseev – 335 jáne Dmıtrıı Popko – 384. WTA: Elena Rybakına – 10, Iýlııa Pýtınseva – 44, Jibek Qulambaeva – 449, Gózal Aınýtdınova – 506 jáne Anna Danılına – 542.