Nesıeni teńgemen berý kólemi ulǵaıdy

2023 jylǵy 1 qańtardaǵy jaǵdaı boıynsha bank sektorynda jetkilikti kapıtal qory bar. Negizgi kapıtaldyń jetkiliktilik koeffısıenti (k1) – 18,5 pa­ıyzdy, menshikti kapıtaldyń jet­kiliktilik koeffısıenti (k2) – 21,7 paıyzdy qurady. Bul júıe boıynsha ortasha alǵanda zań­namada belgilengen normatıvterden edáýir asyp túsedi.

Ekonomıkaǵa kredıt 2022 jyly 23,3 paıyzǵa, 22,8 trln teńgege deıin ósken. Sonyń ishinde teńgemen berilgen nesıe kólemi – 26,4 paıyzǵa, 21 trln teńgege ulǵaısa, shetel valıýtasyndaǵy nesıe kólemi 3,1 paıyzǵa, 1,9 trln teńgege azaıǵan. Nátıjesinde, 2022 jyly teńgemen usynylǵan kredıttiń úles salmaǵy 89,7 pa­ıyzdan 91,9 paıyzǵa deıin artty.

«2022 jyly barlyǵy 24,2 trln teńgege jańa kredıtter berildi, bul 2021 jylmen salystyrǵanda 12,8 paıyzǵa artyq. Bul rette 2022 jylǵy jeltoqsanda 2,6 trln teńge berildi, bul bir aı burynǵyǵa qaraǵanda 7,3 paıyzǵa kóp. Zańdy tulǵalarǵa kredıtter 2022 jyly 11,5 paıyzǵa, 8,7 trln teńgege deıin ósti. Jeke kásipkerlerdi qosa alǵanda, bıznes sýbektilerine berilgen jıyntyq kredıt 2022 jyly 13,9 paıyzǵa, 9,6 trln teńgege deıin kóbeıdi. Bul rette ShOB sýbektilerine qaryzdar 15,2 paıyzǵa, 6 trln teńgege deıin, iri bızneske qaryzdar 11,8 paıyzǵa, 3,6 trln teńgege deıin ósti. Jeke kásipkerlerdi qosa alǵanda, bıznes sýbektilerine 12,7 trln teńge somaǵa jańa qaryzdar berildi, bul 2021 jylmen salystyrǵanda 7 paıyzǵa artyq», dep habarlaıdy agenttik.

Jeke tulǵalarǵa berilgen kredıt kólemi byltyr 31,8 paıyzǵa, 14,2 trln teńgege deıin artqan. Tıisinshe byltyrdyń nátıjesi boıynsha nesıe portfeliniń de sapasy aıtarlyqtaı joǵary deńgeıde qalyp otyr. Máselen, 2023 jylǵy 1 qańtarda kredıttik portfeldiń jalpy kóleminde bereshek merzimi 90 kúnnen asqan kredıtterdiń úlesi 3,4 paıyzdy nemese 815 mlrd teńgeni qurady.

«ShOB-ty eskere otyryp zańdy tulǵalardyń portfelinde bereshek merzimi 90 kúnnen asqan qaryz deńgeıi 3 paıyzdy nemese 321 mlrd teńge bolsa, jeke tulǵalardyń portfelinde 3,7 paıyzdy nemese 493 mlrd teńgeni quraıdy. Bereshek merzimi 90 kúnnen asqan kredıtterdiń provızııalaryn óteý joǵary deńgeıde saqtalady jáne 76,9 paıyz bolyp otyr», dep málimdedi agenttik.

Jalpy, bankterdiń taza paıdasy 1,5 trln teńgege jetti. Bul – 2021 jylmen salystyrǵanda 13,7 paıyzǵa joǵary kórsetkish. 2023 jylǵy 1 qańtardaǵy jaǵdaı bo­ıynsha bankt aktıvteriniń ren­tabeldiligi (ROA) 3,7 paıyzdy (2022 jylǵy 1 qańtardaǵy jaǵdaı bo­ıynsha – 3,8 paıyz), kapıtaldyń ren­ta­beldiligi (ROE) – 30,4 paıyz­dy (2022 jylǵy 1 qańtardaǵy jaǵ­daı boıynsha – 30,6 paıyz) qurady.

Aıta keteıik, 2023 jylǵy 1 qańtardaǵy jaǵdaı boıynsha Qazaqstannyń bank sektorynda 21 ekinshi deńgeıdegi bank bar, onyń 12-si – shetel qatysatyn bank, onyń ishinde 9-y –  enshiles bank.