Bas redaktorlar klýbynyń basshylyq quramy saılandy

«Bas redaktorlar klýby» – 2007 jyly qurylǵan jáne quramyna Qazaqstannyń 250-den astam buqaralyq aqparat quraldarynyń bas redaktorlary men jetekshileri kiretin erikti qoǵamdyq birlestik. Bas redaktorlar klýbynyń negizgi maqsaty – memlekette shyǵarmashylyq atmosferasyn nyǵaıtý, buqaralyq aqparat quraldary arasynda tıimdi básekelestikti nyǵaıtý, qoǵamda ultaralyq kelisim men turaqtylyqty nyǵaıtý.

Konferensııa barysynda klýbtyń qurylǵan kúninen bastap atqarǵan jumysyna sholý jasalyp, esepti kezeńde uıymdastyrǵan is-sharalary týraly belgili jýrnalıst, medıamenedjer, Parlament Senatynyń depýtaty, Ulttyq Quryltaı tóraǵasynyń orynbasary, «Bas redaktorlar klýby» qoǵamdyq birlestiginiń prezıdenti Bıbigúl Jeksenbaı baıandady. Basqosýǵa qatysqan áriptesterdiń suraqtaryna jaýap qaıtaryp, klýb músheleriniń usynys-pikirleri tyńdaldy.

Esep berý-saılaý konferensııasy sońynda qoǵamdyq birlestiktiń jańa quramdaǵy basqarma músheleri men jańa atqarýshy dırektory saılandy. Bas redaktorlar klýbynyń prezıdenti bolyp Bıbigúl Jeksenbaı qaıtadan saılanyp,  klýbtyń atqarýshy dırektory  bolyp Halyqaralyq Televıdenıe jáne radıo akademııasynyń akademıgi, belgili jýrnalıst Mahat Sadyqtyń kandıdatýrasy biraýyzdan qoldaý tapty. 

«Bas redaktorlar klýby» qoǵamdyq birlestiginiń jańa quramdaǵy basqarma músheleri – vıse prezıdentteri:

1. Muratbek Toqtaǵazın - Respýblıkalyq  «Ádilet.Rýhanı jańǵyrý»  gazetiniń bas redaktory, professor;
2. Ysqaq Egemberdıev - «Aıqyn-Lıter» JShS dırektory, Phd doktor ;
3. Qambar Ahmetov – jýrnalıst, «Qazaq gazetteri» JShS bas dırektorynyń orynbasary;
4. Marat Bashımov – qoǵam qaıratkeri, «Chelovek ı zakon»  gazetiniń bas redaktory;
5. Doǵan Iyldyz – jýrnalıst, «kazaknews.kz» jáne «kazakistan.kz» aqparattyq agenttikteriniń jetekshisi.

Konferensııa jumysy barysynda Aqparat jáne qoǵamdyq damý mınıstrliginiń Aqparat komıtetiniń tóraǵasy mindetin atqarýshy Nurlybek Jeńisbekuly  sóz sóılep, aqparattyq keńistikte áriptestikpen jumys isteýge daıyn ekendikterin bildirdi.