2022 jyldyń qańtar-jeltoqsan aılary aralyǵynda Biryńǵaı aqparattyq medısınalyq Call-ortalyǵyna 759 164 ótinim kelip túsken. Onyń ishinde 707,5 myń adam keńes alsa, 24 myń júginýshi shaǵym qaldyrdy.
Taldaý kórsetkendeı, ótinishterdiń 85%-ynda 1406-ǵa qońyraý shalynǵan. Shamamen 14% ótinim Qorǵa Qoldau 24/7» mobıldi qosymshasyna kelip tústi. Qordyń fms.kz resmı saıty, Telegram-daǵy @Saqtandyrýbot, QR Densaýlyq saqtaý mınıstrliginiń saıty men blogy syndy keri baılanys arnalary da halyq arasynda tanymal.
Áleýmettik medısınalyq saqtandyrý qorynda atap ótkendeı, ótinimderdiń 93%-ynda keńes berilse, 50 myńnan astam ótinimdi egjeı-tegjeıli qaraý jáne jaýap berý úshin 2-shi jáne 3-shi qoldaý jelisine jiberildi.
Astana, Almaty, Aqmola jáne Aqtóbe oblystarynyń turǵyndary áleýmettik medısınalyq saqtandyrý qory operatorlarynyń keńesin belsendi paıdalanady.
Qorda atap ótkendeı, respýblıkalyq mańyzy bar qalalarda el halqynyń 20%-y turady. Sáıkesinshe munda medısınalyq qyzmetterdi tutynýshylar basym ári halyq tarapynan jıi suraqtar qoıylady.
Áleýmettik medısınalyq saqtandyrý qory ózin pasıentterdiń ombýdsmeni retinde ustanatyny kópshilikke málim. Sol sebepti adamdar medısınalyq kómek alý kezinde quqyqtary buzylǵan jaǵdaıda Qorǵa jazyp, habarlasady.
О́tken jyly naýqastar Qorǵa 24 myń shaǵym jibergen. Aldyńǵy kezeńmen salystyrǵanda olardyń sany 35%-ǵa artty (2021 jyly 17,7 myń shaǵym). Shaǵymdardyń jartysyna jýyǵy Almaty, Astana qalalaryna jáne Qaraǵandy oblysyna tıesili.
Azamattar kóbinese medısınalyq kómektiń sapasyz kórsetilgenin aıtyp shaǵymdanady (32,6%). Ekinshi orynda medısınalyq kómek kórsetýden bas tartý tur (19%). Sondaı-aq medısınalyq kómekti uzaq kútý (5,8%), dári-dármektermen qamtamasyz etýden bas tartý (4,8%), etıka men deontologııany buzý (4%), medısınalyq uıymnyń aqparattyq júıelerinde kórsetilmegen qyzmetti kórsetildi dep kórsetken jalǵan aqparat (3,2%) boıynsha shaǵymdar tústi.
«Naýqastar óz emhanalarynda beıindi mamandar bolmaǵan kezde, basqa medısınalyq uıymdarǵa joldama ala almaǵandaryn nemese aqyly negizdegi tekserýler men konsýltasııalarǵa jiberilgenderin, sonymen qatar, ýaqtyly em ala almaı nemese sapasyz emdelgenderin, beıindi dárigerlerdiń konsýltasııalaryn uzaq kútkenderin, medısına qyzmetkerleriniń dóreki áreketi, TMKKK kiretin medısınalyq kómekti alýǵa saqtandyrý mártebesin zańsyz talap etkenderin jáne óz quqyqtary buzylǵanyn aıtyp shaǵymdanady», dep atap ótti Áleýmettik medısınalyq saqtandyrý qory.
Esterińizge sala keteıik, Áleýmettik medısınalyq saqtandyrý qorynyń sarapshylary árbir shaǵym boıynsha jospardan tys monıtorıng júrgizedi jáne onyń qorytyndysy boıynsha buzýshylyqtar rastalǵan jaǵdaıda aıyppul sanksııalary qarastyrylady.
Qor kelip túsken ótinish-shaǵymdardy taldaý jáne monıtorıng arqyly keri baılanys sapasyna halyqtyń kóńili tolǵanyn anyqtaıdy. Jyl qorytyndysy boıynsha 95,3% tolyqqandy jaýap beriledi.
