Almaty oblysynyń aty ozǵan spartakıada

Grek-rım kúresi sheberleriniń sa­ıysyn­da sensasııalyq nátıjeler kóp tir­kelse, burymdylardyń básekesinde tań­daı qaǵarlyqtaı esh oqıǵa bolǵan joq. Fı­nalǵa shyqqan balýandardyń barlyǵy da buǵan deıin de elishilik dodalarda qarsylas shaq keltirmeı, halyqaralyq arenalarda da eleýli tabystarǵa qol jetkizip júrgen saqa sportshylar edi. Máselen, 68 kg salmaqtaǵy shymkenttik Elena Shalygınaǵa Almaty oblysynyń ókili Gaýhar Muqataıdy jeńý esh qıyn­dyq týǵyzǵan joq. Gaýhardyń jasy – 24-te. Al Elena – 36 jasta. Shalygına 2008 jyly Beıjiń Olımpıadasynda úshinshi oryndy ıelense, álem chempıonattarynda úsh márte júldegerler sanatyna qosyldy. 2010 jyly Azııa oıyndaryn utyp, qurlyq birinshiliginde bes ret (2 altyn+2 kúmis+1 qola) jeńis tuǵyryna kóterildi. Keıinnen úlken sporttan qol úzdi.

Arada 10 jyl ótken soń sportshy boz­­kilemge qaıta oraldy. Kelgen bette bir­den óziniń myqtylyǵyn moıyndatty. Byl­tyr Elena el chempıony atansa, bıyl spar­takıadada bas júldeni oljalady. Bir keremeti, Almatydaǵy jarysta elimizdiń birde-bir balýany ardager balýannyń ek­pinine shydaı almady.

Birer jyldan beri 72 kg sal­maq dárejesiniń tizginin eshkimge ber­meı júr­gen astanalyq Jámıla Baq­ber­­­­genovaǵa alǵashqy kezeńde jastar ara­­syndaǵy álem men qurlyq birin­shi­likteriniń júldegeri, Batys Qazaqstan oblysynan kelgen Anastasııa Panasovıch ájeptáýir qarsylyq kórsetti. Biraq myq­tynyń aty myqty ǵoı. Birte-birte Já­mıla ony sabasyna túsirdi. Sońǵy eki álem chempıonatynyń kúmis júldegeri, Azııanyń eki dúrkin chempıony degen dardaı ataqtary bar balýan aqyrynda Anastasııadan baqandaı 11 upaı ozdy. Tóreshiniń beldesýdi merziminen buryn toqtatýdan basqa amaly qalmady.

55 kgdaǵy Marına Sedneva (Almaty oblysy) aqtyq synǵa deıin alqynbaı jet­ti. Jastardyń álem birinshiliginiń eki dúrkin qola júldegeri, Azııa chempıony jáne áıelder arasyndaǵy qurlyqtyń basty dodasynda úshinshi orynǵa taban ti­regen ol sheshýshi tusta Gúlsamal Nur­landy (Aqtóbe) aıqyn basymdyqpen ut­ty. 57 kg salmaqta Nılýfar Raı­movaǵa (Túrkistan) teń keler eshkim tabylmady. Jastar arasyndaǵy álem chempıony fınalda Aınur Áshimovadan (Almaty oblysy) aılasyn asyrsa, 59 kgdaǵy Dıana Kaıýmova (Astana) Áıgerim Ibarshevany (Aqtóbe) qapy qaldyrdy.

62 kg salmaq dárejesindegi Irına Kýznesova (Aqmola) men Aıaýlym Qasy­movanyń (Almaty oblysy) ózara báse­kesi óte tartysty ótti. Bul aıqas sál ǵana basymdyqpen Kýznesovanyń paıdasyna sheshildi. 65 kgda Álbına Qaıyr­geldınova (Aqmola) jeńis toıyn toı­lady. Fınalda ol Darıǵa Áben­di (Túrkistan) jeńdi. Al asa jeńil sal­maqta jastar býy­nynyń ókili Ellada Mahıaddınovanyń (Aqmola) mereıi ústem boldy.

Balýan Sholaq atyndaǵy sport saraıyna jınalǵan jurt 76 kg salmaq dárejesindegi aqtyq saıysty asyǵa kút­­­ti. Bozkilemge qaraǵandylyq El­mı­ra Syzdyqova men astanalyq Gúl­ma­ral Erkebaeva shyqty. Elmıra – Rıo Olım­pıadasy men Jakartadaǵy Azııa oı­yndarynyń qola júldegeri. Sony­men qatar ol qurlyq chempıonatynda alty ret (1 altyn+2 kúmis+3 qola) je­ńis tuǵyryna kóterilgen. Gúlmaral – Azııa chempıonatynyń tórt dúrkin qo­la júldegeri. Osy balýandardyń ózara aı­qasy árkez asa shıelenisti ótedi. Kóp jaǵdaıda báseke taǵdyryn bir nemese eki upaı ǵana sheshkenin kózimiz kórgen. Birde Syzdyqova jeńse, endi birde Er­kebaevanyń baǵy janady. Bul joly da dál solaı boldy. Ekeýi sońǵy sekýndtarǵa deıin aıanbaı aıqasyp, aqyrynda bir ǵana upaı aıyrmashylyǵymen qaraǵandylyq sportshy jeńiske jetti.

Taǵy bir aıta keterligi, dál sol kúni ataqty balýanymyzdyń týǵan kúni edi. Osylaısha, Elmıra óz-ózine keremet syı jasap, spartakıadanyń jeńimpazy atandy. Qazaqstan kúres federasııasy men Azııa kúres konfederasııasynyń pre­zıdenti, Birikken kúres áleminiń bıýro múshesi Dáýlet Turlyhanov chempıondy tý­ǵan kúnimen quttyqtaý úshin sport saraıyna arnaıy at basyn burdy.