Tanymal sáýletshi Qonaev qalasyn damytýǵa atsalysady

Búgin Almaty oblysynyń ákimi Marat Sultanǵazıev «Urban Living» JShS mamandarymen kezdesti. Basqosýda tanymal sáýletshiler qalany damytýǵa baǵyttalǵan josparlarymen bólisip, kózqarastaryn aıtqan.

«Urban Living» JShS-niń bas arhıtektory – Marko Brýnellı. Al kompanııanyń seriktesi – Rıkardo Marını.

«Bizdiń seriktestik ýrbanıstik jáne qala qurylysy jobalaryn ázirleýge mamandanǵan konsaltıngtik kompanııa. Basty baǵyty – «pleısmeıkıng». Biz adamdardyń qolaıly ómir súrýine jaǵdaı jasalǵan, kórneki nysandardyń syzbasyn jasaý arqyly qala qurylysyna aralasyp, týrızmdi damytýǵa atsalysamyz», dedi sáýletshi Rıkardo Marını.

Onyń aıtýynsha, Qapshaǵaı sý qoımasynyń jaǵajaıynda iri nysandar turǵyzý úshin aldymen topotúsirilim jasaý qajet.

«Kóldiń jaǵajaıyndaǵy aımaqtarǵa jaqsy tastar tóseýge qarjy quıýǵa bolady. Biraq, bul jumystyń esh nátıjesi bolmaıtynyn túsingenimiz jón. Eń aldymen, jaǵajaı men ǵımarattar aralyǵyndaǵy nysandardyń elge paıda ákeletin tustaryn oılastyrý qajet. Kóldiń jaǵasy adamdar úshin qaýipsiz aımaq bolýy tıis. Sonymen qatar munda jaıaý júrginshilerge basymdyq berilgenimen, shuǵyl kómek kórsetýshi avtomobılderdiń qozǵalysy da nazardan tys qalmaýy kerek. Biz qalanyń qazirgi jaı-kúıimen tanysar kezde topotúsirilimniń joqtyǵy jumysqa kedergi keltirdi. Joǵaryda aıtylǵan jobalardy júzege asyrý úshin topotúsirilim jasalýy kerek», dedi sáýletshi.

О́ńir basshysy bul túsirilimniń mindetti túrde jasalatynyn, keıin ekijaqty kelissózder taǵy da júrgiziletinin aıtty.

«Bakýde eshteńesi joq jaǵajaı az ýaqyttyń ishinde ádemi demalys ornyna aınaldy. Ol jerde de qatelespesem, sizder alǵa tartyp otyrǵan prınsıpter boıynsha jumystar júrgizildi. Arhıtektorlardyń usynǵan jobasy Qonaevtyń keńestik dáýirden shyǵyp, zamanaýı qalaǵa bet burýyna septigin tıgizetinine senimdimiz. Qapshaǵaıdyń jaǵajaıyn zerttep, joba jasaýǵa kúsh salǵandaryńyz úshin alǵysymdy bildiremin. Topotúsirilimnen keıin ózderińizben qoıan-qoltyq jumys isteýge ázirmiz», dedi Marat Sultanǵazıev.

Buǵan deıin «Urban Living» JShS Túrkistan qalasynyń jobasyn jasaǵan. Sodan keıin joba ınvestorlardy tartý úshin paıdalanylyp, shaharda «Kerýen saraı» boı kóterdi.

Aıta keteıik, Rıkardo Marını – Anglııanyń qala qurylysy boıynsha Koroldik Instıtýtynyń jáne Shotlandııadaǵy Koroldik arhıtektorlar uıymynyń múshesi, arhıtektýra men qala qurylysynyń halyqaralyq sarapshysy. Ol Máskeý, Býenos-Aıres, Nıý-Iork sekildi iri qalalardaǵy birneshe jobanyń avtory.

Al Marko Brýnellı – arhıtektýra ǵylymynyń doktory, Italııanyń ekologııalyq qurylys keńesiniń múshesi. Ol Dı Trento provınsııasy Ýnıversıtetiniń stýdenttik jataqhanalary sııaqty qoǵamdyq ǵımarattardy jobalaýmen aınalysqan.