Túrkistanda Ortalyq Azııa memleketteriniń Parlamentaralyq forýmy ótip jatyr

Aýqymdy is-sharaǵa aımaqtaǵy elder Parlament Palatalarynyń delegasııalary qatysyp jatyr. Eki kúnge jalǵasatyn forýmda parlamentaralyq qatynastardy keńeıtýdiń basym baǵyttary men birtutas rýhanı-mádenı keńistikti damytýdyń ózekti máseleleri talqylanady.

Qazaqstan Parlamenti Senatynyń Tóraǵasy Máýlen Áshimbaev óz sózinde Ortalyq Azııa elderi arasyndaǵy qarym-qatynasty ári qaraı nyǵaıtý úshin osyndaı kezdesýlerdiń mańyzy zor ekenin aıtty. Palata Spıkeri aımaqtaǵy elderdiń Memleket basshylarynyń baılanysy joǵary deńgeıde ekenin de tilge tıek etti. Sondaı-aq ózara yntymaqtastyqty jan-jaqty jáne belsendi damytýǵa Parlament ókilderi de óz úlesterin qosýy kerektigin atap ótti.

Forýmǵa qatysyp jatqan qyrǵyz, ózbek, tájik jáne túrikmen delegasııalaryn tıisinshe Qyrǵyzstan Jogorký Keneshiniń Tóraǵasy Nurlanbek Shakıev, О́zbekstan Olıı Majlısi Senatynyń Tóraıymy Tanzıla Narbaeva, Tájikstan Madjlısı namoıandagon Madjlısı Olı Tóraǵasy Mahmadtoır Zokırzoda jáne Túrikmenstan Medjlısiniń Tóraǵasy Gýrbanmýrat Ashyrov bastap keldi.

Is-shara kezinde depýtattar Ortalyq Azııa elderiniń jan-jaqty strategııalyq yntymaqtastyǵyn nyǵaıtý máselesin jáne Parlamentterdiń osy úderistegi rólin talqylaıdy. Sonymen qatar forýmǵa qatysýshylar ortaq tarıhı-rýhanı muraǵa negizdelgen mádenı-gýmanıtarlyq yntymaqtastyqty keńeıtý barysyna nazar aýdarady.

Forýmnyń qorytyndysy boıynsha Túrkistan deklarasııasy qabyldanady. Qujatta ekonomıkalyq ózara is-qımyldy keńeıtýge jáne ózindik biregeıligimen erekshelenetin Ortalyq Azııanyń birtutas mádenı-tarıhı keńistigin qalyptastyrýǵa arnalǵan parlamentaralyq qatynastardy odan ári damytý perspektıvalary kórsetiledi.

Aıta keteıik, atalǵan Parlamentaralyq forýmdy ótkizý týraly sheshim byltyr shilde aıynda ótken Ortalyq Azııa Memleketteri basshylarynyń Konsýltatıvtik kezdesýinde qabyldandy.