Vedomstvonyń habarlaýynsha, Memleket basshysy Qasym-Jomart Toqaevtyń tapsyrmasy aıasynda jekelegen sanattarǵa jatatyn azamattardyń máselesin jedeldetip sheshý úshin qazir elimizde jeke turǵyn úı qoryndaǵy baspananyń jalǵa alý aqysyn sýbsıdııalaý tetigi iske asyrylyp jatyr.
«Bıyl osy maqsatqa 50 mlrd teńge bólinedi. Bul 70 myńǵa jýyq adamdy qamtýǵa múmkindik berip, olardyń baspanany jalǵa alýdaǵy tóleminiń 50 paıyzyn óteýge septesedi», delingen habarlamada.
Atalǵan baǵdarlamaǵa qatysý úshin Otbasybank.kz platformasyna ótinish jiberý qajet.
«Sýbsıdııalaýǵa ótinishter elektrondy sıfrly qoltańba (ESQ) arqyly qabyldanady. Sonymen qatar jalǵa beriletin turǵyn úıdi azamattar ózderi izdep, tańdaýy tıis. «Otbasy bank» turǵyn úıdi jalǵa alý boıynsha sýbsıdııalardy jaldaý shartynyń qoldanylý merzimi men tólemderdiń kestesine sáıkes aı saıyn tóleıdi», delingen mınıstrlik habarlamasynda.
Jalǵa alý tólemderi boıynsha memlekettik sýbsıdııany alýǵa kelesi sanattaǵy adamdar úmitker bola alady:
- I jáne II toptaǵy múgedekter;
- múmkindigi shekteýli balalardy tárbıelep otyrǵan otbasylar;
- jetim balalar;
- kóp balaly otbasylar.
Bul rette, úmitker otbasylardyń keıingi 6 aıdaǵy orta aılyq jıyntyq tabysynyń mólsheri januıanyń ár múshesine shaqqanda eń tómengi kúnkóris deńgeıinen aspaýǵa tıis. Otbasy banki sýbsıdııa alýshylardyń sáıkestigine monıtorıng júrgizip, aı saıyn tólem tártibin qadaǵalaıdy. Al jergilikti ákimdikter keminde toqsanyna bir ret jalǵa beriletin turǵyn úıdi tekserip otyrady.
«Bul oraıda jaqyn týystarynan, buryn nekede turǵan jubaılarynan jáne erli-zaıyptylardyń týystarynan turǵyn úıdi jalǵa alýǵa, sondaı-aq atalǵan baspanany qaıta jaldaýǵa ótkizýge tyıym salynady», dep eskertedi vedomstvo ókilderi.
