Is-shara sheberligi shyńdala bastaǵan shymyr jigitterdiń qoıan-qoltyq urys ádisterin pash etýimen bastaldy. Kásibı mashyǵy joǵary mamandar jas ulandardyń ónerin baǵalaýda fızıkalyq múmkindikterimen qatar ıntellektýaldyq áleýetine de aıryqsha mańyz berdi. Desanttyq-shabýyldaý áskerleri qolbasshysynyń keńesshisi otstavkadaǵy podpolkovnık Kabır Naýrýshev: «Jas desantshylar óz elin súıetin jáne onyń táýelsizdigin qorǵaı alatyn naǵyz patrıottar dep bilemiz. Aıbary myqty azamattar – el tiregi. Olarǵa júkteletin jaýapkershilik joǵary. Bolashaq áskerı adamǵa batyrlyqpen qatar asqan sezimtaldyq, ushqyr qııal, aqyl-parasat qajet», dep jarysqa qatysýshylarǵa jiger berdi.
Saıysta árbir komanda múshesi klýb basshylary men nusqaýshylar úıretken daǵdylardyń bárin múltiksiz oryndaýǵa kúsh saldy. Pnevmatıkalyq myltyq atý, avtomatty bólshekteý jáne qurastyrý, jalpy áskerı qorǵanys kostıýmin kııý normatıvin pysyqtaý boıynsha ónerlerin ortaǵa saldy. Jigitter kermege tartylyp, názik jandy patrıottar jeńil jattyǵýlar boıynsha ózara baq synasty.
Jarys qorytyndysy boıynsha birinshi oryndy Qonaev garnızony áskerı bóliminiń «Jas desantshy» komandasy, ekinshi oryndy Almaty desanttyq-shabýyldaý quramasynyń «Túrksib» komandasy, úshinshi oryndy materıaldyq-tehnıkalyq qamtamasyz etý polkiniń «Barys» komandasy ıelendi.
Barlyq pán boıynsha eń joǵary nátıje kórsetken Taldyqorǵan garnızonynyń 18404 áskerı bóliminiń komandasy jankúıerler yqylasyna bólenip, jarystyń bas júldesin jeńip aldy.
Aıryqsha ónerimen daralanǵan «Túrksib» klýbynyń tárbıelenýshisi Amına Zaýrova ótken jyldyń jeltoqsan aıynda «Jas sarbaz» áskerı-patrıottyq qozǵalysyna qabyldanǵan. Sabaqtardyń arqasynda ol salystyrmaly túrde qysqa merzimde atý men sportta keremet nátıjelerge qol jetkizgenin aıtady.
– Biz Raıymbek batyr atyndaǵy desanttyq-shabýyldaý quramasyna kún saıyn sabaqqa kelemiz. Nusqaýshylar bizge atys qarýyn bólshekteýge jáne qurastyrýǵa, alǵashqy medısınalyq kómek kórsetý negizderine, jer bederin baǵdarlaýǵa, parashıýtti jınaýǵa jáne basqa da pánderge úıretedi. Bizdiń jetistikterimizdi ózimiz bilim alatyn №78 mektep-gımnazııa maqtan tutady, – deıdi Amına.
«Túrksib» áskerı-patrıottyq klýby 61993 áskerı bóliminiń bazasynda úsh jyldan beri jumys isteıdi. Atys daıyndyǵy jónindegi nusqaýshy serjant Ramazan Súleımanovtyń pikirinshe, áskerı-qoldanbaly pánderge degen qyzyǵýshylyq, birinshiden, balalardy smartfonnan alshaqtatady, ekinshiden, olardyń boıyndaǵy senimdiligin arttyryp tózim men tártipke tárbıeleıdi. Jyldan-jylǵa jarysqa qatysýshy órenderdiń sheberligi shyńdala túsken. Joǵary synyp talapkerleri qatardaǵy áskerı qyzmetshilerdeı ózderin senimdi ustaıdy deıdi uıymdastyrýshylar.
Atap ótsek, «Aıbyn» jastardyń jyl saıynǵy áskerı-patrıottyq jıynyna 14 pen 18 jas aralyǵyndaǵy Qazaqstannyń áskerı-patrıottyq klýbtarynyń, áskerı kolledjderdiń, mektep-ınternattardyń jáne «Jas ulan» respýblıkalyq mektepteriniń tárbıelenýshileri qatysady. Jobaǵa qatysa otyryp, Desanttyq-shabýyldaý áskerleriniń áskerı-patrıottyq klýbtarynyń ókilderi únemi joǵary nátıjeler kórsetip, júldeli oryndarǵa ıe bolyp keledi. Olardyń arasynda halyqaralyq jarystarda el namysyn abyroımen qorǵap júrgen talantty jastar da bar.
ALMATY
