Qarakemerde sport kesheniniń qazyǵy qaǵyldy

Kórshi qyrǵyz elimen aýyly aralas, qoıy qoralas jatqan Qordaı aýdanynda Qarakemer degen aýyl bar. Qarakemer jurty bul aımaqqa kásipkerlikke beıimdiligimen, saýda-sattyqqa eptiligimen tanymal. Aýyl turǵyndary jyl on eki aı jylqy baılap, Taraz, ásirese, jaqyn bolǵandyqtan Almaty qalasyna et saýdalaýmen aınalysady. Eldiń osy eńbekqorlyǵyn, baqýatty turmysyn, berekeli tirligin nasıhattaý maqsatynda qaıbir jyly óńir basshylyǵy Qarakemerge oblystyń barlyq aýyl, aýdan ákimderin jıyp, osyndaǵy ıgilikti isterdi úlgi etken-di. Mine, osy úlgili aýylda jaqynda taǵy bir úlken tirliktiń tusaýy kesildi. «Otaý stroı» JShS prezıdenti, osy aýyldyń túlegi Qaırat Moldaseıitov mektep janynan úlken sport kesheniniń qurylysyn bastady. Bul, árıne, Qaırat Quseıinulynyń týǵan aýyly, bilim alǵan qasıetti shańyraǵy men ustazdaryna, jalpy jerlesterine degen qurmeti, taǵzymy, ystyq yqylasy ekeni aıdan anyq. «Baı bolsań, elińe paıdań tısin» degen, bıznes áleminde kóptegen bıikterdi baǵyndyryp, ońdy tirlikterimen tanylǵan «Otaý-stroı»-dy el bir jaǵy qaıyrymdy isterimen de jaqsy biledi. Buǵan deıin osy kompanııa óz demeýshiligimen Er Túriktiń besigi – kıeli Túrkistanda 16 páterlik úıdiń qurylys salynyp, 16-synyń da kiltin turmysy tómen, múgedek jandarǵa tabys etkenin, odan bólek dál osy qasıetti qalada múgedek balalardy ońaltý ortalyǵyn da óz qarjylaryna salyp, paıdalanýǵa bergenin, Shymkent qalasynda da birqatar ıgilikti ister atqarǵanyn aqparat quraldary jazǵan bolatyn. Sondaı-aq, Qaırat Moldaseıitov osydan eki-úsh jyl buryn Qarakemerge 100 oryndyq balabaqsha men meshit, emhana salyp berip, týǵan aýylynyń alǵysyn alǵan-dy. «Áleýmettik jaýapkershilik turǵysynan memleket negizinen óz jolynan ótti, tutastaı alǵanda, óziniń osy fýnksııasyn tıimdi oryndady. Endi – kezek bıznestiki...», degen bolatyn Elbasy Nursultan Nazarbaev. Osy turǵydan kelgende «Otaý-stroı» JShS Elbasy amanatyna adaldyq tanytyp júrgen mekeme ekenin moıyndaýymyz kerek. Bıznestiń áleýmettik jaýapkershiligin arttyrý maqsatynda qazyǵy qaǵylǵan bul sport kesheniniń aýyldyń damýyna jáne jastar arasynda salamatty ómir saltyn keńinen nasıhattaýǵa qosar úlesi zor. «Elimizde sport ınfraqurylymdarynyń turaqty ósý úrdisi baıqalǵanymen, áli de aýyldyq jerlerde sport ǵımarattarynyń sany jetkiliksiz bolyp turǵany jasyryn emes. Sporttaǵy myqtylardyń kópshiligi aýyldan shyqqan ǵoı. Sport adamǵa ustamdy minez beredi. Sondyqtan qurylysy kelesi jyldyń kúzinde aıaqtalyp, paıdalanýǵa beriletin bul keshen balalardy eptilikke ǵana baýlyp qana qoımaı, jaqsy tálim-tárbıe beretin ortalyq bolýy tıis. Bul shańyraqtan bolashaqta olımpıada chempıondarynyń, elimizdiń myqty azamattarynyń shyqpasyna kim kepil?» – deıdi bul jóninde Q. Moldaseıitov. Jaqsy tirlik juǵysty keledi eken. Qaırat Moldaseıitovtiń osy tirligi Qarakemerde týyp-ósken birqatar baqýatty jigitterge túrtki bolyp, aldaǵy ýaqytta aýyldyń kireberisine úlken qaqpa qoıyp, birqatar kóshelerdi jóndep, múmkin bolsa saz mektebin ashýǵa oı tastady. Oralhan DÁÝIT, «Egemen Qazaqstan». Jambyl oblysy. Sýretti túsirgen Altynbek QARTABAEV.