Bul Býndestagtyń HH shaqyrylymyndaǵy «Germanııa - Ortalyq Azııa» parlamenttik toby músheleriniń Qazaqstanǵa jáne Ortalyq Azııa óńirine alǵashqy sapary bolyp otyr.
Qazaqstandyq senator Palata qyzmetiniń negizgi baǵyttary jáne respýblıkanyń saıası ózgeristeri týraly eýropalyq áriptesterine aıtyp berdi.
Kezdesý barysynda Qazaqstan men Germanııa arasyndaǵy yntymaqtastyqtyń jaı-kúıi men keleshegi talqylandy. Oǵan elimizdiń Prezıdenti Qasym-Jomart Toqaevtyń 2019 jáne 2020 jyldardaǵy Germanııaǵa saparlary jańa serpin bergen bolatyn.
Depýtattar ekonomıkalyq jáne mádenı-gýmanıtarlyq saladaǵy yntymaqtastyqtyń basym baǵyttaryn atap ótti.
- «Qazaqstan - Germanııa» jáne «Germanııa -Ortalyq Azııa» parlamenttik dostyq toptarynyń elderimiz arasyndaǵy baılanystary men ózara túsinistikti nyǵaıtýǵa yqpal etetin nátıjeli ózara is-qımylyn atap ótý mańyzdy. Biz osyǵan baılanysty Býndestagtyń depýtattar tobynyń jańa quramymen ótken onlaın-kezdesýdiń qorytyndylaryn joǵary baǵalaımyz. Sonymen qatar eki eldiń parlament komıtetteri arasynda tikeleı baılanys ornatýdy usynamyn», - dedi Asqar Shákirov.
Taraptar Qazaqstan men Germanııanyń, sonymen qatar halyqaralyq uıymdardyń alańynda parlamentaralyq ózara is-qımyldy nyǵaıtýǵa daıyn ekendikterin bildirdi.
