Qujatta jazasyn óteýshi jeke tulǵalardy qoǵamdyq jumysqa tartý tártibin aıqyndaıtyn 49-bapty engizý kózdelgen. Jańa bap boıynsha, qoǵamdyq jumystardy ákimshilik jaýapkershilikke tartylǵan tulǵa turǵylyqty jeri boıynsha ornalasqan qoǵamdyq oryndarda atqarady. Tegin jumysty jergilikti atqarýshy organdar aıqyndaıdy.
«Qoǵamdyq jumystarǵa, ádette, eldi mekendi abattandyrý, kóshelerdi qardan, qoqystardan tazartý, shekaralardy, aǵashtardy aqtaý jáne taǵy basqalary jatady. Bul óz kezeginde profılaktıkalyq áser etedi jáne memlekettik bıýdjetti aıtarlyqtaı únemdeıdi», dep jazylǵan qujatta.
Qoǵamdyq jumystar saǵatpen esepteledi jáne 10-nan 150 saǵatqa deıingi merzimge belgilenedi. Jumys isteıtin nemese oqıtyn adam úshin úzdiksiz negizde kúnine 4 saǵattan aspaýǵa tıis. Al turaqty jumys orny joq jáne oqymaıtyn adamdar kúnine 8 saǵatqa deıin, biraq aptasyna 40 saǵattan aspaıtyn merzimde oryndaıdy.
Zań jobasynda qoǵamdyq jumystarǵa tartýǵa bolmaıtyn adamdardyń sanaty anyqtalǵan. Olar:
- júkti áıelder;
- 3 jasqa deıingi balalardy jalǵyz tárbıelep otyrǵan tulǵalar;
- 18 jasqa tolmaǵan tulǵalar;
- I jáne II toptaǵy múgedektigi bar tulǵalar;
- 58 jáne odan joǵary jastaǵy áıelder;
- 63 jáne odan joǵary jastaǵy er adamdar;
- shetel azamattary jáne Qazaqstanda turaqty turmaıtyn azamattyǵy joq adamdar.
Qoǵamdyq jumystardy oryndaý kezeńinde joǵaryda atalǵan jaǵdaılar oryn alǵan jaǵdaıda sot mundaı adamdy ishki ister organdarynyń ótinishhaty boıynsha qoǵamdyq jumystardan bosatýǵa nemese qoǵamdyq jumystardyń merzimin qysqartýǵa ne aıyppulǵa aýystyrýǵa quqyly. Bul jaǵdaıda sot aıyppul mólsherin adamnyń jumys istegen saǵattaryn eskere otyryp aıqyndaıdy.
Sonymen qatar quqyq buzýshynyń qoǵamdyq jumystarǵa keshigip kelýine aýyrý jáne basqa da qujattalǵan jaǵdaılar sebep bola alady.
Al ákimshilik qamaqqa alý merzimin ótegennen keıin qoǵamdyq jumystardy oryndaýdan jaltarǵany úshin ákimshilik qamaqqa alynǵan adam qoǵamdyq jumystardy oryndaýdan bosatylmaıdy. Olarǵa 200 AEK (612 600 teńge) mólsherinde aıyppul salynady.
Adamdy qoǵamdyq jumystardy oryndaýdan jaltarǵan dep taný negizderi 49-2-bapta aıqyndalǵan. Ol boıynsha:
- qoǵamdyq jumystardy oryndaýǵa kirisýden bas tartqandar ne qoǵamdyq jumystardy oryndaý merzimi ishinde dáleldi sebeptersiz eki retten artyq kelmegender;
- qoǵamdyq jumystardy oryndaý kezeńinde QR zańnamasynda belgilengen tártippen medısınalyq kýálandyrýmen rastalǵan masań kúıde bolǵan jaǵdaıda;
- qoǵamdyq jumystardy oryndaýdan jaltarý maqsatynda jasyrynǵan;
- dálelsiz sebeptermen QR aýmaǵynan tys jerlerge ketkender jaltarǵan tulǵa dep tanylady.
Qoǵamdyq jumystardy oryndaý úshin jergilikti atqarýshy organǵa ornalasqan jeri boıynsha 3 kúnnen artyq kelmegen adam jaltardy dep tanylady.
