Júrgizýshiler arasynda kólik tártibin jaqsartý, jol-kólik oqıǵalarynyń sanyn azaıtý, sondaı-aq jol qozǵalysy erejelerin buzýdyń aldyn-alý maqsatynda Astana qalasy polısııa departamentiniń qyzmetkerleri «Qaýipsiz jol» jedel-profılaktıkalyq is-sharasyn ótkizip jatyr.
Bul is-sharanyń nátıjesinde tártip saqshylary JPISh-tiń ekinshi kúniniń qorytyndysy boıynsha 1400-ge jýyq jol qozǵalysy erejelerin buzý faktisin anyqtady. Onyń ishinde kólikti mas kúıde basqarý boıynsha 25 derek, qarsy jolaqqa shyǵyp ketý boıynsha 10 derek, kólik quralyn basqarý kezinde telefon paıdalaný boıynsha 60 derek, qaýipsizdik beldigin taqpaý boıynsha shamamen 165 derek anyqtaldy.
Sonymen qatar polısııa qyzmetkerleri júrgizýshilerdiń oqıǵa ornynan boı tasalap ketken 27 jol-kólik oqıǵasyn tirkedi. Sonyń biri týraly aıtar bolsaq, Chevrolet kóliginiń júrgizýshisi 9 jastaǵy qyzdy qaǵyp, oqıǵa ornyna boı tasalaǵan. Bul týraly qyzdyń anasy «102» arnasyna birden habarlaǵan.
Polıseıler oqıǵa ornyna dereý jetip, beınebaqylaý kameralarynyń kómegimen 20 mınýt ishinde júrgizýshini anyqtaǵan. Ol jolaýshylardy tasymaldaǵan 24 jastaǵy taksı júrgizýshisi bolyp shyqty.
Qazir tergeý júrip jatyr. Polıseıler júrgizýshilerdi jol kólik oqıǵasy bolǵan jaǵdaıda eshqaıda qashyp ketpeýin suraıdy. Ol adam báribir qolǵa túsedi. Sebebi qala kóshelerine ornatylǵan beınebaqylaý kameralary quqyqbuzýshylyqty túsirip qana qoımaı, oqıǵa ornynan boı tasalap ketken quqyq buzýshyny tez arada ustaýǵa septigin tıgizedi.
