Kezdesýde erekshe qajettiligi bar tulǵalardyń quqyqtyq, áleýmettik jaǵdaıy talqylandy. Aýylda turatyn múmkindigi shekteýli jandardyń jaǵdaıy, olardyń orta, joǵary bilim alý múmkindigi aıtyldy. Jınalǵandar aldynda sóz alǵan Májilis depýtattyǵyna kandıdat, PhD Tańsáýle Serikov óz ómirinen mysaldar keltirip, baıandy bolashaq árkimniń óz qolynda ekenin atap ótti.
«Aýyl» partııasyna ne úshin keldim? Sebebi partııadan jasymas jigerdi kórdim. Onyń ustanymy halyqtyń, ásirese aýyldyqtardyń oı-armany, maqsat-múddesimen úndesedi. Partııa baǵdarlamasy jattandy qurǵaq ýádeden ada. Ol aýyldyq jerde keminde 20 jyl jumys istegen azamattarǵa zeınetaqyny, onda turatyn erekshe qajettigi bar barlyq azamatqa áleýmettik járdemaqyny ulǵaıtý, az qamtylǵandar men áleýmettik osal toptar ókilderi úshin azyq-túlik tólem júıesin engizý týraly máselege bastamashylyq jasap júr. «Saýsaq birikpeı, ıne ilikpeıdi» demekshi, biz biriksek, talaı ilkimdi isti júzege asyramyz, taǵdyrlas baýyrlarymyzǵa múmkindik pen úmit syılaımyz», dedi Tańsáýle Serikov.
Jıyn sońynda erekshe qajettiligi bar jandardan quralǵan «Qanattylar» teatry is-sharaǵa qatysýshylarǵa teatrlandyrǵan kórinis qoıyp, merekelik kóńil kúı syılady.
Kandıdattar jıynnan keıin Qosshy turǵyndarymen kezdesip, úgit-nasıhat jumystaryn júrgizdi. Olarǵa «Aýyl» partııasynyń saılaýdaǵy baǵdarlamasyn, atap aıtqanda qala turǵyndaryn aýyl kásipkerligin ınvestısııalaýǵa tartý, qajetti ekonomıkalyq yntalandyrýlar men quqyqtyq kepildikter bere otyryp, «qalalyq» bıznesti aýyldarǵa kóshirý týraly túsindirdi. Turǵyndar ózderin mazalaǵan saýaldaryna tushymdy jaýap aldy.
