Komıtet tóraǵasy Asqar Shákirov Parlament Senaty kóktemgi sý tasqynyna baılanysty problemalyq máselelerdi jyl saıyn kóterip kele jatqanyn atap ótti. Ol sońǵy jyldary kóktem kelgen saıyn sý tasqyny bolatynyn jáne ol myńdaǵan aýyl turǵyndary qıyn jaǵdaıda qalatynyn aıtty.
«Atqarýshy bılik tótenshe jaǵdaılarǵa daıyndyq týraly jyl saıyn esep beredi, alaıda sý tasqyny kezinde kúsh-qýat pen qural-jabdyq udaıy jetispeı qalady. Keıinnen sonyń zardaptaryn joıýǵa ájeptáýir bıýdjet qarjysy jumsalady», dedi Asqar Shákirov.
Tótenshe jaǵdaılar mınıstriniń orynbasary Mereke Pishembaev sý tasqyny salasyndaǵy aǵymdaǵy jaǵdaı týraly baıandama jasady. Ol 2023 jyldyń basynan beri qatty jaýyn-shashyn men temperatýranyń kúrt kóterilýinen 1 úı, 46 eldi mekendegi 317 aýla aýmaǵy zardap shekkenin jáne 24 jol ýchaskesin sý basqanyn habarlady. Bul jaǵdaıda TJM kúshimen sý aıdaý, qum toly qapshyqpen bógeý jáne sý ketetin arnalardy tazartý jumystary júrgizildi.
Sınoptıkterdiń aldyn ala boljamy boıynsha sý tasqyny qaýpi bar aımaqtar anyqtalyp otyr. Soltústik Qazaqstan, Shyǵys Qazaqstan, Aqmola, Qaraǵandy, Aqtóbe, Almaty, Jambyl, Túrkistan, Qyzylorda, Batys Qazaqstan, Atyraý, Qostanaı oblystarynda, sondaı-aq Abaı jáne Jetisý oblystarynda qater qaýpi joǵary ekeni anyqtaldy.
Kezdesýde elimizdegi sý tasqyny jaǵdaıyna qarsy is-qımyl týraly aıtylǵan usynystar salalyq mınıstrlikterdiń jumysynda, sondaı-aq depýtattardyń zań shyǵarý qyzmetinde eskeriletin bolady.
