Kúnshyǵys elindegi bizdiń basty úmitimiz Mıhaıl Shaıdorov ekeni esh daý týǵyzbasa kerek. Al sol sportshy jaıynda biz ne bilemiz? Mıhaıl 2004 jyldyń 25 maýsymynda Almatyda dúnıege kelgen. Onyń ákesi Stanıslav ta osy sport túrin serik etip, kezinde Qazaqstannyń birneshe dúrkin chempıony atanǵan. Keıinnen bapkerlik kásiptiń qamytyn kıip, ózge jas órendermen birge óz ulyn da dúbirli dodalarǵa daıyndady. Alataý baýraıynan bastaý alǵan jattyǵý jumystary keıinnen Máskeýde óz jalǵasyn tapty. Ýaqyt oza Shaıdorov 1994 jyly Lıllehammerde ótken Olımpııa oıyndarynyń jeńimpazy, álem chempıonatynyń qola júldegeri, Eýropa chempıony Alekseı Ýrmanovtyń qol astynda sheberligin shyńdady.
Daryndy jas kóp uzamaı óz qatarynyń aldy boldy. Ol 2019 jyly jastar arasyndaǵy Qazaqstan birinshiliginde top jarsa, kelesi jyly eresekterdiń el chempıonatynda bas júldeni oljalady. Buǵan qosa Shaıdorov Máskeýdegi Rýster kýbogi men Ystanbuldaǵy Bosfor kýbogi jáne Gdanskidegi Gran-prı saıysynda kúmispen kúpteldi. Bolgarııanyń astanasynda uıymdastyrylǵan «Sofia Trophy» týrnırinde qolaǵa qol sozdy.
Jerlesimiz 2021 jyly Stokgolmde ótken álem chempıonatyna da qatysty. Biraq saqa sportshylar bas qosqan baıraqty básekede 16 jastaǵy jas óren senim údesinen shyǵa almaı, kósh sońynda qalyp qoıdy. Desek te bul sátsizdik Mıhaıldyń jigerin jasyta alǵan joq. Ol tyńbaı eńbektenip, sheberligin shyńdaı tústi. Jattyǵý úderisine jańa elementter engizdi. Nátıjesi jaman bolǵan joq. Byltyr sáýir aıynda Tallınde jalaýy jelbiregen jastar arasyndaǵy álem birinshiliginde Shaıdorın kúmis medaldi moınynda jarqyratty. Atalǵan jarysta ol tek AQSh-tyń jas juldyzy Ilıa Malınınge jol berdi. Al japonııalyq Tasýıa Sýboıǵa qola medal buıyrdy. Osylaısha, onyń esimi jastardyń dúnıejúzilik dodasynda júlde alǵan Qazaqstannyń tuńǵysh mánerlep syrǵanaýshysy retinde tarıhta qaldy.
Juptyq saıysta synǵa túskeli otyrǵan sportshylar jaıynda aıtar bolsaq, 22 jastaǵy Gaýhar Naýryzova Aqtaý qalasynda dúnıege keldi. 24 jastaǵy Boısangýr Datıev – Reseıdiń týmasy. Olar 2016 jyldan beri birge óner kórsetip keledi. Ekeýi de Máskeýde jattyǵady. Alǵashynda bul jup Aleksandr Jýlınnen tálim-tárbıe alsa, keıinnen Anjelıka Krylovanyń qol astyna ótti. Bul mamandardyń da esimderi jankúıerlerge jaqsy tanys. Ekeýi de – ár jyldary Olımpııa oıyndarynda júlde alyp, álem chempıony atanǵan naǵyz maıtalmandar. Ázirge Naýryzova men Datıev halyqaralyq arenada aýyz toltyryp aıtarlyqtaı tabystarǵa qol jetkize almaǵanymen, elishilik jarystarda aldyna jan salmaı júr.
Esterińizge sala keteıik, byltyr Fransııanyń Monpele qalasynda ótken álem chempıonatynda Japonııa quramasy óte tamasha óner kórsetip, tórt birdeı júldege qol jetkizgen edi. Atap aıtsaq, Sema Ýno (erler) men Kaorı Sakamoto (áıelder) altyn tuǵyrǵa kóterilse, Iýma Kagıama (erler) men Rıký Mıýra/Rıýıtı Kıhara (sporttyq jup) kúmis medaldi ıelendi. 1 altyn, 1 kúmis jáne 3 qolany qorjynǵa salǵan AQSh-tyń sportshylary ekinshi orynǵa taban tiredi. Bul eldiń órenderi arasynan Aleksa Knırım/Brendon Freızer (sporttyq jup) aldyna jan salmady. Úshinshi orynda – Fransııa. Jarys qojaıyndaryna jalǵyz altyndy syıǵa tartqan – Gabrıela Papadakıs/Gııom Sıezeron juby (muzdaǵy bı). Sondaı-aq atalǵan jarysta Belgııaǵa bir kúmis jáne Kanadaǵa bir qola medal buıyrdy.
