Otyrys barysynda senatorlar «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksine (Salyq kodeksi) jáne «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksin (Salyq kodeksi) qoldanysqa engizý týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasyn ekinshi oqylymda qarady. Palata depýtattary zań jobasynyń jańashyldyqtaryn negizinen qoldaı otyryp, onyń jekelegen erejelerine birqatar tolyqtyrý engizýdi usyndy. Osylaısha, qujat jańa redaksııamen qabyldandy.
Senat Tóraǵasy qabyldanǵan zań elimizdegi salyq zańnamasyn odan ári jetildirý úshin ázirlengenin atap ótti. Naqty aıtqanda, jańa normalar azamattardyń tólem qabilettiligin jáne bankrottyǵyn qalpyna keltirý, ósimdikter dúnıesi obektilerin paıdalaný jáne halyqtyń kóshi-qony salasyndaǵy salyq erejelerin naqtylaıdy.
«Senat bul zańǵa birqatar túzetý engizdi. Olardyń bir toptamasy bólshek salyqtyń arnaýly rejımine qatysty. Bul salyq rejımi pandemııadan zardap shekken sektorlarda jumys isteıtin kásipkerlerdi qoldaý úshin Memleket basshysynyń tapsyrmasymen ýaqytsha engizilgen edi. Mundaı shara shaǵyn jáne orta bıznes sýbektilerine úlken demeý bolyp, óziniń tıimdiligin kórsetti. Sondyqtan bólshek salyqty qalpyna keltirip, onyń jumysyn merzimsiz etý úshin tıisti túzetýler engizdik. Osy zań salyqtyq mindettemeni oryndaýǵa baılanysty qatynastardy jetildirýge jáne salyq salýdyń aıqyndylyǵyn qamtamasyz etýge oń áserin tıgizedi dep senemiz», dedi Máýlen Áshimbaev.
Sonymen qatar otyrys barysynda «2014 jylǵy 29 mamyrdaǵy Eýrazııalyq ekonomıkalyq odaq týraly shartqa ózgerister engizý týraly hattamany ratıfıkasııalaý týraly» zań qabyldandy. Onyń normalary Eýrazııalyq ekonomıkalyq odaq sheńberinde taýarlardy ákelý kezinde janama salyqtar alý tártibin retteıdi. Sondaı-aq zań EAEO-ǵa múshe memleketterdiń kásipkerleri arasyndaǵy ózara saýdanyń artýyna yqpal etýdi kózdeıdi.
Búgin senatorlar «Eýrazııalyq ekonomıkalyq odaqta tasymaldaýdy qadaǵalaý úshin navıgasııalyq plombalardy qoldaný týraly kelisimdi ratıfıkasııalaý týraly» zańdy da qabyldady. Bul zań kóleńkeli trafıkti qysqartýǵa, kedendik baqylaý prosesin ońtaılandyrýǵa jáne kóliktik-logıstıkalyq qyzmetterdi damytýǵa oń yqpal etýge baǵyttalǵan. Kelisim qadaǵalaý obektilerin, navıgasııalyq mórlerge qoıylatyn talaptardy, ulttyq operatorlardyń qyzmetin aıqyndaıdy. Odan bólek, Eýrazııalyq ekonomıkalyq odaqqa múshe memleketterdiń qadaǵalaý organdarynyń ózara is-qımyl nysandaryn belgileıdi.
Palata otyrysynda «Qazaqstan Respýblıkasynyń Úkimeti men Ázerbaıjan Respýblıkasynyń Úkimeti arasyndaǵy О́simdikter karantıni jáne olardy qorǵaý salasyndaǵy yntymaqtastyq týraly kelisimdi ratıfıkasııalaý týraly» zań maquldandy. Atalǵan zań eki el arasyndaǵy karantın jáne ósimdikterdi qorǵaý salasyndaǵy yntymaqtastyqty damytýǵa múmkindik beredi, sonymen birge, tıisti fıtosanıtarııalyq qaýipsizdikti qamtamasyz etedi.
Sondaı-aq senatorlar «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zańdy eki oqylymda qarap, oǵan birqatar túzetý engizip, maquldady.
Zańnyń negizgi maqsaty jer zańnamasynyń jekelegen erejelerin buzǵany úshin ákimshilik jaýapkershilikti belgileý jáne jerdi paıdalaný men qorǵaýǵa memlekettik baqylaý júrgizetin organdarǵa ákimshilik isterdi qaraý jáne tıisti jazalar qoldaný boıynsha ókilettikter berý ekenin atap ótken jón.
«Bul zań jer zańnamasyn buzǵany úshin jekelegen baptar boıynsha ákimshilik jaýapkershilikti naqtylaýǵa arnalyp otyr. Sonymen qatar zań sheńberinde jerdi paıdalaný men qorǵaýǵa memlekettik baqylaý júrgizetin organdardyń ókilettikterin qaıta qaraý kózdelgen. Jańa normalar jer ýchaskesine quqyq berý kezinde sybaılas jemqorlyq táýekelderin joıýǵa jáne jerdi paıdalaný men qorǵaýǵa qatysty memlekettik baqylaýdy kúsheıtýge múmkindik beredi dep senemiz», dedi Máýlen Áshimbaev.
