Kósh basynda – Saýl Alvares. Árıne, buǵan tańdanýǵa bolmaıdy. О́ıtkeni Meksıkanyń marqasqasy ekinshi orta salmaqta absolıýtti álem chempıony atanyp otyr. 17 jyl boıy kásipqoı rıngte judyryqtasyp júrgen 32 jastaǵy Kanelo 62 kezdesý ótkizip, sonyń 58-inde jeńiske jetti. Eki ret utylyp, eki básekeni teń aıaqtady. Ol tek osydan 10 jyl buryn Floıd Meıvezerden, al byltyr Dmıtrıı Bıvoldan upaı sanymen utyldy. Dál osy Alvares 2017-2022 jyldar aralyǵynda GGG-men úsh márte judyryqtasyp, eki retinde jeńiske jetken edi. Taǵy bir básekede jeńimpaz anyqtalǵan joq.
Ekinshi oryndy Taıson Fıýrı ıelenýde. Asa aýyr salmaqtaǵy WBC nusqasynyń chempıondyq belbeýin ıelenip otyrǵan 35 jastaǵy Ulybrıtanııanyń alyby osy sport túrin serik etkeli 18 jylǵa jýyqtady. Sol aralyqta 34 ret aıqasyp, birde-bir jekpe-jekte jeńilgen joq. 24 qarsylasyn nokaýtqa jiberdi. Ol tek 2018 jyly Deonteı Ýaıldermen teń tústi. Biraq keıinnen dál sol AQSh boksshysyn Fıýrı eki ret ońdyrmaı sabady. Bıyl 29 sáýirde «Syǵan patshasy» Aleksandr Ýsıkpen aıqasady. Dál osy jekpe-jekte alyptar arasyndaǵy álemniń absolıýtti chempıony anyqtalady.
Úshinshi satyǵa Dmıtrıı Bıvol jaıǵasty. Qyrǵyzstanda týyp-ósip, keıinnen Reseıge qonys aýdarǵan ol – jartylaı aýyr salmaqta WBA-nyń sýperchempıony. 32 jastaǵy Toqmaqtyń týmasy byltyr Saýl Alvaresten aılasyn asyryp, jer-jahan jankúıerleriniń qoshemetine bólendi. Odan keıin Hılberto Ramıresti utyp, sol jeńisiniń kezdeısoq emestigin dáleldedi. 2014 jyldan beri Bıvol 21 ret sharshy alańǵa shyǵyp, barlyq qarsylasynan basym tústi. 11 kezdesýdi ol merzimnen buryn aıaqtady.
Sondaı-aq TOP-10 kásipqoı boksshynyń qatarynda Terens Kroýford (AQSh), Gennadıı Golovkın (Qazaqstan), Aleksandr Ýsık (Ýkraına), Entonı Djoshýa (Ulybrıtanııa), Naoıa Inoýe (Japonııa), Errol Spens (AQSh), Lıam Smıt (Ulybrıtanııa) syndy sańlaqtar bar.
