Alyptar Astanaǵa attandy

Keshe Astanada Qazaqstan Respýblıkasynyń Prezıdenti N.Nazarbaevtyń júldesine arnalǵan qazaq kúresinen ótetin «Qazaqstan barysy» respýblıkalyq týrnıriniń fınaldyq synyna daıyndyq máselesi habarlandy.  Kezdesýde «Qazaqstan barysy» qazaq kúresin damytý qory qamqorshylar keńesiniń tóraǵasy Arman Shoraev bıyl tórtinshi ret shymyldyǵyn túretin týr­nır­diń jańalyǵy kóp ekenin, tóreshiler men balýandar sany qysqarǵanyn,  osynyń bári tól kúresimizdiń sapasyn arttyrý maqsatynda jasalǵanyn atap ótti. «Bıylǵy týrnırden bes balýan shettetildi. Eger qatysýshy dopıng-baqylaýdan óte almasa nemese týrnır erejesin buzsa, jarystan alastatylady», dedi ol. Sonymen birge, ol tóreshilerdiń de týrnırge irikteýden ótkenin aıtty. «Jaqynda biz 12-15 adamdy qysqarttyq. Bıyl byltyrǵydaı qazylar alqasy degen bolmaıdy. Osynyń bári fınaldyń ádil ótýi úshin jasaldy», dedi A.Shoraev. Jalpy, joba avtory bıylǵy jarystyń qyzyqty jáne tartys­ty ótetinin, oǵan 28 balýannyń qatysatynyn atap kórsetti. – Bıylǵy týrnırdiń jeńim­pazy burynǵysynsha 150 myń dollar, chempıondyq belbeý men «Taıtuıaq» olja­syn ıelenedi. Budan basqa, ult­tyq boıaýǵa toly dodanyń jankúıer­lerin kóptegen tosyn syı kútip tur eken. «Qazaqstan barysy» týrnırinde tuńǵysh ret «Boes» telearnasynyń bas dırektory Sergeı Zavıleıskıı men okınavalyq sheber, godzıý-rıýdan 10-shy dan ıegeri Senseı Morıo Hıgaonna qonaq bolady. Týrnırdiń fınaldyq syny tikeleı efırde «KAZsport» jáne reseılik «Boes» telearnalarynan kórsetiledi, – dedi ol. Osydan keıin Sport jáne deneshynyqtyrý isteri agenttigi tóraǵasynyń orynbasary Sársen Quranbek memleket tarapynan qazaq kúresin damytýda jasalyp jatqan jumystar týraly aıtty. Kezdesýde  týrnırge arnaıy shyǵarylǵan «Qazaqstan barysy» sútiniń tanystyrylymy ótti. Ol Aqmola oblysynyń Sadovoe eldi mekeninde shyǵarylady. «Bul - repýtasııasy jaqsy, beıtarap ónim. Qazaqstanda óndiriletin súttiń jartysynan kóbi untaqtan jasalady, ıaǵnı olar taza sút emes, sútti sýsyn. Al bul ónim – tabıǵı, naǵyz sıyrdyń súti», – dedi A. Shoraev. Dastan KENJALIN, «Egemen Qazaqstan».