Is-sharaǵa fransýz qoǵamynyń, iskerlik jáne mádenı toptardyń ókilderi, IýNESKO basshylyǵy, sondaı-aq Fransııa men IýNESKO-da akkredıttelgen birqatar dıplomatııalyq mıssııalardyń basshylary qatysty.
Qazaqstan elshisi Gúlsara Arystanqulova ashylý sózinde áıelderdiń qazirgi qoǵamdaǵy mańyzdy ári ósip kele jatqan rólin atap ótti.
«Azamattyq, saıası, ekonomıkalyq, áleýmettik nemese mádenıet salasynda bolsyn, áıelderdiń quqyqtaryn ilgeriletý jáne qorǵaý memlekettiń basty basymdyqtarynyń biri», dedi ol.
Is-shara aıasynda jańadan qurylǵan «Qazaqstannyń Fransııadaǵy isker áıelderi» qoǵamdastyǵynyń tusaýkeseri ótti.
Is-sharaǵa qatysýshylardyń nazaryna «Uly dalanyń áıgili áıelderi» atty fotokórme usynyldy. Kórmede kórnekti tarıhı tulǵalarmen qatar birqatar dıplomatııa, ǵylym jáne bilim, densaýlyq saqtaý, sport jáne mádenıet salarynda úlken jetistikterge qol jetkizgen qazirgi Qazaqstannyń ókilderiniń ómir joly men elimizdiń damýyna qosqan zor úlesteri baıandalady.
Is-sharanyń sharyqtaý shegi Qazaqstan isker áıelder keńesiniń múshesi, halyqaralyq dızaınerler konkýrstarynyń jeńimpazy, aqtobelik dızaıner Malıka Dúısenbaevanyń ulttyq kıimder jıyntyǵynyń kórsetilimi boldy.
