Danıal Ahmetovtiń aıtýynsha, byltyr Shyǵys Qazaqstan oblysynda jalpy quny 2194,2 mıllıard teńge bolatyn ónerkásip ónimi óndirildi. Negizgi kapıtalǵa quıylǵan ınvestısııa kólemi – 545,4 mıllıard teńge. О́tken jyly oblysta 318,1 myń sharshy metr turǵyn úı paıdalanýǵa berildi.
Prezıdentke 2022-2028 jyldarǵa arnalǵan Biryńǵaı ındýstrııalandyrý kartasyna Shyǵys Qazaqstan oblysy jalpy quny 376 mıllıard teńgeni quraıtyn 12 joba usynǵany jóninde málimet berildi. Sonyń ishinde Ulan aýdanynda taý-ken baıytý fabrıkasynyń qurylysyn bastaý, Altaı aýdanynda Altaı taý-ken baıytý kesheniniń óndiristik alańyn keńeıtý jobalary bar.
О́ńir basshysy agroónerkásip keshenin damytýǵa aıryqsha kóńil bólinetinin jetkizdi. Oblysta maıly daqyldardyń egistik aýdany ulǵaıyp, ósimdik maıyn óndeý kólemi 1,8 ese artty. Glýbokoe aýdanynda jylyna 300 myń tonna ósimdik maıyn óndiretin zaýyt iske qosyldy.
Byltyr oblystaǵy shaǵyn jáne orta bıznes sýbektileriniń sany 12,5 paıyzǵa artyp, 61,5 myńǵa jetti. Bıyl Kásipkerlikti damytý jónindegi ulttyq joba aıasynda 1800 kásipkerge qoldaý kórsetiledi.
Prezıdentke oblystaǵy densaýlyq saqtaý jáne bilim berý nysandary qurylysynyń barysy týraly baıandaldy. Qazirgi kezde О́skemen qalasynda gematologııa ortalyǵy, Rıdder qalasynda kópbeıindi aýrýhana salynyp jatyr. «Aýyldaǵy densaýlyq saqtaýdy jańǵyrtý» jobasy aıasynda Ulan aýdanynda bir aýysymda 140 pasıent qabyldaı alatyn emhana, aýyldyq eldi mekenderde 20 densaýlyq saqtaý nysanyn salý josparlanǵan. Al «Jaıly mektep» ulttyq jobasy boıynsha óńirde bıyl 11 mektep paıdalanýǵa berilmek.
Qasym-Jomart Toqaev Danıal Ahmetovke oblystaǵy iri eldi mekenderdiń kommýnaldyq ınfraqurylymyn jańǵyrtýǵa jáne óńir halqynyń turmys sapasyn arttyrýǵa baǵyttalǵan birqatar tapsyrma berdi.
