Anaǵa qurmet – bárine mindet

Aıaýly analar men arýlardyń tól mere­kesine oraı B.Rımova atyndaǵy Taldy­qorǵan drama teatrynda saltanatty kesh shymyl­dyǵyn túrdi. Jetisý oblysynyń ákimi Beıbit Isabaevtyń qatysýymen ótken sharada kıno óneriniń jaryq juldyzy, el maqtanyshy, jurt jadynda «Taqııaly perishte» ataýymen jańǵyrǵan Álimǵazy Raıym­bekovteı abyzdyń asyl jary Gúl­jaýar Aıtjanqyzy sekildi el analary, san salada jemisti eńbek etip kele jatqan qara­paıym qyzmetkerler, qursaǵy qutty, ǵazız júrekti názik jandar men oblystyń betke ustarlary meımandar qatarynan kórindi.

Ásem án áýelep, shalqyǵan kúı shanaqtan ushqan merekelik shara barysynda beınerolık kórsetildi. Onda ǵumyry ǵıbratpen órilgen, kásipten násip tergen analar týraly arnaıy daıyndalǵan beınesholý kórermen yqylasyn oıatty.

Jıynda alǵashqy bolyp oblys ákimi Beıbit Isabaev sóz aldy. Ol áýeli qazaqta Jer-Ana, Otan-Ana deıtin qasıetti uǵymdar baryn, bul elge, týǵan jerge, memleketke qa­­tysty qundylyqtardyń barlyǵy anadan bas­taý alatynyn aıǵaqtaıdy dep atap ótti. So­nymen qatar áıelder qaýymyna qatysty tebi­reniske toly tolǵamyn aıshyqtaı kele, kópshilikti merekemen quttyqtady.

«Jetisý ólkesinde keshegi Zylıha Tam­shybaeva, Bátıma Saqaýova, Altynaı Esbo­latova sııaqty tarıhı tulǵalardyń kóshi jańa zamanda da úzilgen joq. Búgin aramyzda 10 bala, 22 nemere, 23 shóbere tárbıelep otyrǵan belgili akter, «Taqııaly perishte» fılmindegi Taılaq rólimen kóptiń súıis­penshiligine bólengen, kúni keshe ǵana ómirden ozǵan jerlesimiz Álimǵazy Raıymbekov aǵamyzdyń asyl jary Aıtjanqyzy Gúl­jaýar anamyz otyr. Álimǵazy aǵamyzǵa Bıken Rımova, Ámına О́mir­zaqova analarymyz búkil Almatyny aralap, eldiń san qıyrynan kelgen sulýlardyń arasynan qalyńdyq izdep júrip, báribir tańdaýy Gúljaýar apamyzǵa túsken eken. Ekeýi jar­ty ǵasyrǵa jýyq ómirdiń qyzyǵyn da, qıyndyǵyn da birge kórip, úlgili otbasy boldy. Qazir Raıymbekovter úlken áýletke aınalyp otyr», – degen oblys ákimi el anasyna qurmet kórsetti.

Tamyry tereń tarıhtyń kóshinde analar­dyń alatyn orny erek. El basyna kún týǵan sátten eriniń serigi, oshaǵynyń kórigi bolǵan áıelderdiń asqan batyldyǵy men qaıraty shejiremizdiń baıandy bolýyna tegershik. Búgingi tańda kemel eldiń kóshin bastaǵan, san salada tolaıym tabysymen Tolaǵaı atan­ǵandardyń anasy da saltanatty sharada ataýsyz qalmady. Jan jadyratqan, júrek tebirentken sózderimen merekeniń shyraıyn ashqan oblys ákimi qarapaıym eńbek adamdaryn da alqap, ardaqtady. Mereıin ósirdi.

Saltanatty sharada aımaq basshysy aldymen «Altyn alqa» ıelerin marapattady. О́z kezeginde «Kúmis alqa» ıeleri de mereı­lendi. Aıta ketýimiz kerek, búginde qazaqtyń sanyn kóbeıtip jatqan qutty qursaqtardyń deni jas analar ekeni kóńil qýantyp, kóz súısindirdi. Al jıynda taǵy bir jan tolqytqan dúnıe – oblys ákiminiń qolynan Alǵys hat alǵan názik jandylardyń deni mekemelerdiń tazalyǵyna jaýapty, memleketten nesıe alyp, shaǵyn kásibin ashyp jatqan, kópbalaly analar sekildi qarapaıym jandardyń bolýy. Mine, osyndaı qatardaǵy jandardyń mereılenýimen aıshyqtalǵan merekelik kesh kóńil tebirentti. El kósegesin kógertý jolynda tún qalǵymaı, kún tynym tappaı eńbek etip júrgen, ár salada aq adal eńbegimen otbasyna tirek bolǵan aıaýl­y jandarǵa arnalǵan sharanyń sońy kon­serttik baǵdarlamaǵa ulasty. Án asqaqtap, kúı kúmbirledi.

Osy rette aıta keteıik, Panfılov aýda­nynda jergilikti mesenattar men kásip­kerler tórt bala tárbıelep otyrǵan jalǵyz­basty anaǵa úı syılady. Sholaqaı aýylynda turatyn otbasy buǵan deıin apatty úıdi meken etken eken. Endi olar kóktemgi merekeni 12 sotyq jer telimi bar, barlyq qajettiliktermen jabdyqtalǵan 7 bólmeli úlken úıde qarsy aldy. Jetisýdaǵy aıaýly analar merekesi osylaı toılandy.

Jetisý oblysy