Seýlde júlde buıyrmady

Short-trekten álem chempıonaty 1976 jyldan beri úzdiksiz uıym­dastyrylyp keledi. Sol kezden beri dúbirli dodanyń jalaýy 46 márte jel­biredi. Bul básekelerde 10 júlde jıyntyǵy sarapqa salynyp júr. Atap aıtsaq, erler men áıelder 500, 1 000, 1 500 metrlik qashyqtyq pen kóp­sa- ­ı­ys­­ta baq synaıdy. Odan bólek, qyz­dar 3 000 metrlik jáne jigitter 5 000 metrlik estafetada óner kórsetedi.

1976-2022 jyldar aralyǵynda ótken álem chempıonattarynda eń kóp oljaǵa kenelgen komanda – Oń­tústik Koreıa quramasy. Osy sport tú­rin oılap tapqan olar 221 (90 al­tyn+68 kúmis+63 qola) júldeni ol­jalady. Ekinshi jáne úshinshi oryn­darda – Qytaı (64+43+40) men Ka­nada (61+73+61). Úzdik bestikti AQSh (16+16+30) pen Japonııa (13+19+21) túıindep tur. Sondaı-aq je­ńis tuǵyryna kóterilgender qa­tarynda Nıderland (9+13+9), Uly­brı­tanııa (7+10+9), Italııa (5+13+20), Reseı (3+2+1), Aýstralııa (2+5+3), Majarstan (1+5+3), Bolgarııa (1+2+6), Jańa Zelandııa (1+1+0), Germanııa (0+1+1), KSRO (0+1+0) jáne Fransııa men Belgııa (0+0+4) bar. Mine, tórtkúl dúnıeniń úzdikteri jınalǵan jarysta bar-joǵy osy 17 memlekettiń ókilderi ǵana jeńis tuǵyryna kóterilgen eken.

Jekelegen sportshylar arasynan Iаn Iаndy (A) bóle-jara atap ótý­ge bolady. Qytaıdyń maqtanyshy 1994-2005 jyldar aralyǵynda uıymdastyrylǵan dúnıejúzilik dodalarda 45 (30+11+4) júlde aldy. Kanadalyq Sılvı Degl (28+9+2) men Natalı Lamberdiń (22+9+6) tabystaryna da tamsanbaý múmkin emes. Ońtústik Koreıanyń namysyn qorǵap, keıinnen Reseıge qonys aýdarǵan Vıktor An 36 ret (21+11+4) jeńis tuǵyrynan qol bulǵady. Bul – erler arasyndaǵy eń úzdik kórsetkish. Úzdik bestiktiń qataryna Aspanasty eliniń taǵy bir ókili Van Meı enip otyr. Ol da 36 (20+13+3) medalge ıelik etti.

Byltyr Kanadanyń Monreal qalasynda shymyldyǵy túrilgen álem chempıonatynda da Ońtústik Koreıa quramasy ozdy. Olar 9 (5+1+3) júlde oljalady. Majarstan (4+0+0) ekinshi orynǵa turaqtasa, Nıderland (1+1+4) úshinshi satyǵa jaıǵasty. Jarys qo­jaıyndary segiz júlde (0+7+1) alǵa­nymen, altyn medal joqtyǵynan tórtinshi orynda qalyp qoıdy. Besinshi jáne altynshy satylarǵa Fransııa (0+1+0) men Belgııa (0+0+2) taban tiredi. Úıeńki japyraqtar elindegi jarysta majarstandyq Shaoang Lıý men koreıalyq Chhve Mın Djon jasyndaı jarqyldady. 24 jastaǵy sań­laqtyń árqaısysy tórt-tórt altynnan ıelendi.

Kúni keshe Seýlde aıaqtalǵan álemdik dodada Qazaqstan quramasy sapynda Olga Tıhonova, Iаna Han, Mádına Janbosynova, Alına Ájiǵalıeva, Málıka Ermek, Ádil Ǵalıahmetov, Denıs Nıkısha, Abzal Ájiǵalıev, Nur­tilek Qajyǵalı, Erkebulan Sha­muhanov jáne Anton Hvan syndy short-trekshiler óner kórsetti. Bul sportshylardyń birazynyń esimi jankúıerlerge jaqsy tanys. Máselen, Abzal byltyr Beıjińde alaýy tu­tanǵan Olımpııa oıyndarynyń ashylý saltanatynda Qazaq eliniń Kók baıraǵyn ustap shyqty. 500 metrlik saıysta ol jeńis túǵyryna synyq súıem ǵana jetpeı, tórtinshi oryndy qanaǵat tutty. Quramynda Ádil Ǵalıahmetov, Olga Tıhonova, Iаna Han, Denıs Nıkısha jáne Abzal Ájiǵalıev syndy ul-qyzdary bar jerlesterimiz atalǵan jarystyń aralas estafetasynda besinshi oryn aldy. Olar álem chempıonattarynda júldege qol jetkize almasa da, kóńil kónshiterlikteı nátıje kórsetip júr. Sonymen qatar bul sportshylar Álem kýboginiń kezeńdik saıystarynda da júldeden quralaqan qalǵan emes. Ár jyldary otandastarymyzdyń moıyn­darynda túrli-tústi medaldar jarqyrady.

Jaqynda Seýlde aıaqtalǵan álem chempıonatynda sol olqylyqtyń orny tolyp, jerlesterimiz ózderiniń jarqyn jeńisimen óz jankúıerlerin qýantady dep úmittendik. О́kinishke qaraı, olaı bolmady. Qazaqstannyń short-trek sheberleri arasynan tek Denıs Nıkıshanyń ǵana jeńis tuǵyryna kóterilýge tamasha múmkindigi boldy. 27 jastaǵy Qostanaı oblysynyń túlegi 500 metrlik saıysta fınalǵa shyqqanymen, qorytyndy esepte tórtinshi oryndy qanaǵat tutty. Ol álem chempıonatynda úsh ret qola medal ıelenip, Olımpııa oıyndarynyń eki dúrkin júldegeri atanǵan ıta­lııalyq Petro Sıgel, Beıjiń Olım­pıadasynda júldelerdiń tolyq jıyntyǵyn jeńip alǵan kanadalyq Stıven Dıýbýa jáne álem men Eýropa chempıony nıderlandtyq Iens van’t Voýttan qalyp qoıdy. О́zge otandas­tarymyz júldeli oryndar úshin talasa almady.

Atalǵan jarystyń jalpy­ko­mandalyq esebinde Nıder­landtyń short-trekshileri shashalaryna shań juqtyrmady. Qyzǵaldaqtar eliniń ókilderi 5 altyn, 1 kúmis jáne 2 qolany oljalady. Qorjynynda 2 altyn, 3 kúmis jáne 1 qolasy bar Oń­tústik Koreıa quramasy ekinshi oryndy ıelense, 1 altyn, 2 kúmis jáne 2 qolany enshilegen Italııanyń sportshylary úshinshi satyǵa jaıǵasty. Jekelegen sportshylar arasynan Ksandra Velzebýrdiń asqan sheberligine tánti boldyq. 2021 jyly Dordreht pen 2022 jyly Monrealdaǵy álem chempıonattarynda bir-bir altynnan alǵan ol Seýlde úsh márte óz eliniń ánuranyn shyrqatty. Sondaı-aq 21 jastaǵy nıderlandtyq burymdynyń Olımpııa oıyndarynyń jeńimpazy degen ataǵy taǵy bar.