Bul rette taýarǵa ilespe qujatty rásimdeý jónindegi mindettemeler áli de aksızdeletin taýarlarǵa (alkogol ónimi, munaı ónimderi) jáne Qazaqstan ishindegi vırtýaldy qoımaǵa baılanǵan qadaǵalaný mehanızmi týraly kelisim boıynsha SEQ TN-niń 11 kody (tońazytqyshtar) jáne vırtýaldy qoımaǵa baılanystyrmaı EAEO elderine eksport/ımport kezinde keıbir taýarlarǵa qoldanylady.
2023 jyldyń 10 aqpanynan bastap taýarǵa ilespe qujat taýarlardyń jekelegen túrleri (dándi daqyldar) boıynsha EAEO elderine eksport, ımport kezinde rásimdeledi. Al 2023 jyldyń 1 sáýirinen bastap qalǵan taýarlar boıynsha rásimdeledi.
«Atameken» UKP Tóralqa tóraǵasy Raıymbek Batalovtyń aıtýynsha, Qazaqstanda taýarǵa ilespe qujatty engizý bastalǵannan beri bızneske qajetsiz júkteme týdyryp, ónimderdiń qymbattaýyna jáne salyq tóleýshilerdiń jaǵdaıynyń nasharlaýyna ákeletini túsinikti boldy.
«Búgin jaqsy jańalyqty estip, qýandyq. Eki jyldan astam ýaqyt boıy Ulttyq palata júrgizgen jumys beker bolǵan joq. Biz Qazaqstan ishindegi taýarǵa ilespe qujatty joıýǵa qol jetkizdik. Mundaı «shıki» pılottyq prosester jolǵa qoıylmaǵan kezde, júıede tehnıkalyq qateler bolǵanda, al aqparattyq júıe turaqsyz jumys istegende mundaı jaıt bızneste oryn almaýy tıis ekenin dáleldedik. О́ıtkeni bızneste kez kelgen durys emes qadam taýardyń nemese qyzmettiń qunyna áser etedi. Mundaı pılottyq jobalardan tek bıznes qana emes, halyq ta zardap shegedi», dep atap ótti Raıymbek Batalov.
Eske salsaq, ótken jyldyń 30 jeltoqsanynda QR Qarjy mınıstrligi men «Atameken» Ulttyq kásipkerler palatasy arasynda taýarǵa ilespe qujattardy resimdeý boıynsha mindettemelerdi túbegeıli qaıta qaraý týraly yntymaqtastyq týraly memorandýmǵa qol qoıyldy. Osylaısha, eki vedomstvo 2023 jyldyń 1 naýryzyna deıin taýarǵa ilespe qujatty rásimdeý jónindegi mindettemelerdi qaıta qaraýǵa kelisti.
«Eki jyldan astam ýaqyt boıy býhgalterler men kásipkerler Taýarǵa ilespe qujat pen vırtýaldy qoıma pılottyq jobasynyń taýqymetin kórdi. Onyń kúshi joıylǵannan keıin Qazaqstan ishinde, eń bolmaǵanda, taýarǵa ilespe qujat budan ári basqa taýarlarǵa taralmaıtynyna jáne 1,5 mln kásipkerdiń áýre-sarsańǵa túspeıtinine qýanyshtymyz. Qabyldanǵan sharalar býhgalterlerdiń jumysyn edáýir jeńildetedi jáne kásipkerlerdiń shyǵyndaryn azaıtady. Budan ári ımport, eksport kezinde taýarǵa ilespe qujat formasyn ońaılatý boıynsha jumys isteýge bolady», dedi «Atameken» UKP Shaǵyn jáne orta bıznesti damytý komıtetiniń tóraǵasy Berik Zaırov.
Taýarǵa ilespe qujattardy resimdeý jónindegi pılottyq jobany 2020 jyly Memlekettik kirister komıteti engizdi. Bul Eýrazııalyq ekonomıkalyq odaqtyń kedendik aýmaǵyna ákelingen taýarlardyń aınalymyn baqylaýǵa jáne eldegi kóleńkeli ekonomıkany tómendetýge múmkindik berýi kerek edi. Alaıda, jobanyń qorytyndysy ilespe qujattyń jumys isteýi boıynsha prosester jolǵa qoıylmaǵanyn, ony resimdeý boıynsha aqparattyq júıe turaqsyz jumys isteıtinin, tehnıkalyq qateler bar ekenin kórsetti.
Osylaısha, taýarǵa ilespe qujattardy engizý salyq tóleýshiler men salyq organdary arasyndaǵy tıimdi ózara is-qımyldy qamtamasyz etpeıdi, fıskaldyq ákimshilendirýdi qıyndatady, kásipkerlik qyzmetti shekteıdi jáne bıznes pen memlekettiń negizsiz shyǵyndaryna ákep soǵady.
