«Qazaqkonsert» – kıeli Mańǵystaýda

Dál osy joba aıasyndaǵy gas­troldik sapar 13-18 naýryz kúnderi kıeli Mańǵystaý oblysynda bas­taldy. Joba aıasyndaǵy Mańǵystaý, Atyraý, Batys Qazaqstan, Aqtóbe oblystaryndaǵy is-sapar bir aıǵa sozylady. Atalǵan jobanyń maqsaty – óńir turǵyndary úshin mádenı qundylyqtardyń qoljetimdiligin qamtamasyz etý, óner qaıratkerlerine qoldaý kórsetý jáne ulttyq ónerdi dáripteý. Josparǵa saı uıymnyń ártis­teri men shyǵarmashylyq ujym­dary Mańǵystaý jurtshylyǵyna túr­li baǵyttaǵy konserttik baǵdar­lamalardy usynady.

Mańǵystaý oblysy boıynsha Aq­­taý, Jańaózen qalalary, Mu­naı­ly, Beı­neý aýdandary, Otpantaý tarıhı-mádenı kesheni jáne Qara­janbas, Qalamqas kentterinde, Atyraý oblysy boıynsha Atyraý, Qulsary qalalary, Maqat aýdanynyń Dossor jáne Maqat kentteri, Isataı aýda­nynyń Aqqystaý aýyly, Qur­manǵazy aýdanynyń Qurmanǵazy aýyly, Qy­zylqoǵa aýdanynyń Mııaly aýyly jáne Inder aýdanynyń In­derbor kentinde, Batys Qazaqstan oblysy boıynsha Oral, Aqsaı qa­lalary men Báıterek, Tasqala, Ja­ńaqala, Syrym aýdandarynda, Aq­tóbe oblysy boıynsha Hromtaý qalasy men Qobda, Qarǵaly, Mártók, Mu­ǵal­jar aýdandarynda, Qostanaı ob­lysynyń ortalyǵy men Rýdnyı mo­noqalasynda, sonymen qatar bir­­qatar aýdan men eldi mekenniń hal­qyna «Qazaqkonsert» ujymynyń ártisteri óz ónerlerin pash etedi. Bul joba byltyrǵydaı oblystyq ákim­diktermen jáne jergilikti Má­denıet basqarmalarymen birlesip ótkiziledi.

Mańǵystaý óńirinde júrgen «Qa­zaqkonsert» ujymy, eń aldy­men, on eki qulpytas ortasynan qos kúmbezi kóterilip, altynmen ap­talǵan Otpantaý tarıhı-má­denı kesheninde arnaıy konserttik baǵ­darlama uıymdastyrdy. Kórer­men­niń qoshemetine bólengen mekeme ártisteri Kórisý merekesine oraı óńir turǵyndarynyń aldynda án shyr­qap, kúı tartyp, kóterińki kó­ńil kúı syılady. Shyǵarmashylyq ujym halyq kompozıtorlary Aqan se­­riniń, Yqylas Dúkenulynyń, Qa­zan­­ǵaptyń, Jaıaý Musanyń, Táttim­bettiń, Naýryzbaıdyń, Shámshi Qal­daıaqovtyń, Áset Beıseýovtiń jáne basqa da zamanaýı avtorlardyń ánderi men kúılerin oryndady.

«Biz «El birligi – Jańa Qazaq­stan» jobasyn 2022 jyly bastaǵan bolatynbyz. Bıyl da osy úrdisti jal­ǵastyra otyryp, kıeli batys óńi­rine gastroldik saparmen kelip otyr­myz. Prezıdent Q.Toqaev óńir­lerdegi mádenıettiń sapa­syn kóterip, kórkeıtý úshin onyń qol­je­timdiligin qamtamasyz etý máse­le­sin kótergen bolatyn. Osyǵan oraı atalǵan jobany qaıtadan uıym­dastyrýdy qolǵa aldyq», dep atap ótti Roza Baǵlanova atyndaǵy «Qazaqkonsert» mem­lekettik konserttik uıymy dırek­­torynyń shyǵarmashylyq qyzmet bo­­ıyn­sha orynbasary Serik Nur­moldaev.

Munaıly aýdanynda aqyn Farıza Ońǵarsynova atyndaǵy ortalyq Má­denıet úıinde, Qarajanbas jáne Qa­lamqas ken oryndarynda, Beıneý aýdanynyń turǵyndary úshin arnaıy mádenı is-sharalar kórermen nazaryna usynylady. Sondaı-aq 15 naýryz kúni Aqtaý qalasynda gala-konsert ótedi.

Kıeli Mańǵystaý jerine «Qa­zaq­konserttiń» kóptegen ártisi bar­dy. Atap aıtatyn bolsaq, Qazaq­stan­nyń eńbek sińirgen qaırat­ker­leri Je­ńis Ysqaqova, Aıgúl El­shi­­bae­va, Raýshan Orazbaeva, res­pýb­­lı­ka­lyq baıqaýlardyń laýreattary Dinıslambek Jaılaýbaı, Álı­­han Dúı­senbaı, «Astana sazy» qazaq mem­lekettik folklorlyq an­sambli, «Melomen» jáne «T&Y» toby bar. Sondaı-aq «Turan» fol­klor­ly-etnografııalyq ansambli qu­ryl­ǵa­nyna 15 jyl tolýyna oraı arnaıy me­rekelik konsert usynady.

Budan bólek aldaǵy ótetin Aty­raý, Batys Qazaqstan jáne Aq­tó­be oblystaryndaǵy is-sharaǵa Q­a­zaq­stannyń halyq ártisi Maq­pal Júnisova, Qazaqstannyń eń­bek sińirgen ártisi Baǵdat Sáme­dı­nova, Qazaqstannyń eńbek sińirgen qaı­ratkerleri Aıjan Nurma­ǵam­be­tova, Aıgúl Elshibaeva, Medet Sa­lyqov, Klara Tólenbaeva, Saltanat Ahmetova, Nurbolat Arzamas, «Má­denıet salasynyń úzdigi» Perızat Turarova, «Daryn» memlekettik jas­tar syılyǵynyń laýreaty Asqar Muqııat jáne Álibek Almadıev, respýblıkalyq jáne halyqaralyq baıqaýlardyń laýreattary Raıym Ýaıs, Dinıslambek Jaılaýbaı, Ernar Sadyrbaı (Amre), Saltanat Meńdiǵalıeva, sondaı-aq «Astana sazy» qazaq memlekettik folklorlyq ansambliniń ártisteri óner kórsetedi.

Aıta keteıik, «El birligi – Jańa Qazaqstan» jobasy Mádenıet jáne sport mınıstrliginiń qoldaýymen kezeń-kezeńmen 2022-2025 jyldar aralyǵynda iske asyrylady. Joba aıasynda 2025 jylǵa deıin 28 aýdan, 29 monoqala, 20 oblys ortalyǵynyń turǵyndary jospar boıynsha qam­tylatyn bolady.