«Biz baýyrlas Túrkııaǵa úlken aýyrtpalyq ákelgen asa joıqyn jer silkinisine baılanysty jınaldyq. Myńdaǵan baýyrymyz qaza tapty. Marqumdardyń týǵan-týystaryna jáne búkil Túrkııa halqyna taǵy da kóńil aıtamyn. Alapat zilzalanyń zardabyn tartqan Túrik eliniń qaıǵysy – barsha túrki jurtynyń qasireti dep bilemin. Qazaqta «Qaıǵyny bólisseń – azaıady» degen sóz bar. Aǵaıynnyń basyna kún týǵanda bizdiń halqymyz eshqashan qol qýsyryp otyrmaıdy», dedi Prezıdent
Prezıdent atap ótkendeı, Qazaqstan halqy birden túrik baýyrlarǵa qol ushyn sozdy. Qutqarýshylarymyz jáne dárigerlerimiz dereý kómekke attandy. Qajetti quraldarmen jabdyqtalǵan eń tájirıbeli, bilikti mamandarymyz qutqarý jumysyna atsalysty. Baýyrlas elge gýmanıtarlyq jáne qarjylaı kómek kórsetildi.
«Joıqyn jer silkinisi elimizdiń azamattaryn da beı-jaı qaldyrmady. Bizdiń halqymyz baýyrlarymyzdyń basyna túsken qıyndyqty birge kóterýge atsalysty. Qazaqta «Asar» degen jaqsy uǵym bar. Jurt birlesip, muqtaj janǵa kómek qolyn sozady. Osy maqsatta Qazaqstannan Anadoly eline kóptegen eriktiler kelip, aıanbaı eńbek etti. Olar – el basyna aýyrtpalyq túskende alǵy shepte bolatyn shynaıy patrıot azamattar, jany taza adamdar», dep sózin tolyqtyrdy Memleket basshysy.
Eriktilerdi ortaq iske jumyldyrý asa mańyzdy. Sondyqtan, Prezıdet Uıymymyzǵa múshe elderdiń ókilderin bıyl Astanada ótetin Eriktiler forýmyna shaqyrdy.
- «Jumyla kótergen júk jeńil» deıdi halqymyz. Biz baýyrlas Túrkııaǵa odan ári qoldaý kórsetýge daıynbyz. Osy oraıda, apat aımaǵynda áleýmettik nysan salyp berýge daıyn ekenimizdi aıtqym keledi. Bul baýyrlas Túrik halqyna shynaıy iltıpatymyzdyń kórinisi bolatynyna senimdimin, - dedi el Prezıdenti.
