Saıasat • 18 Naýryz, 2023

Býndestag depýtattary Qazaqstannyń saıası reformalarymen tanysty

118 ret kórsetildi

Qazaqstan Parlamenti Májilisiniń depýtattaryn saılaý qarsańynda QR Elshisi Nurlan Onjanov Býndestag depýtattaryna, dıplomatııalyq korpýs ókilderine, Germanııanyń qoǵam jáne saıası qaıratkerlerine, sarapshylar men iskerlik toptary ókilderine, sondaı-aq nemis jýrnalısterine Qazaqstannyń ishki saıası júıesiniń qazirgi damýy, elimizde júrgizilip jatqan reformalar jáne 2023 jyldyń 19 naýryzynda jańa saılaý erejeleri boıynsha ótetin parlamenttik saılaýynyń ereksheligi týraly aqparat berdi, dep habarlaıdy Egemen.kz.

Qazaqstandyq dıplomat ınklıýzıvti jáne aýqymdy reformalar úshin jańartylǵan demokratııalyq mandat arqyly ulttyq jańǵyrtýdy jedeldetetin Qazaqstan zańnamasyndaǵy ózgerister týraly egjeı-tegjeıli aıtyp berdi.

Onyń aıtýynsha, aldaǵy saılaý aralas saılaý júıesi boıynsha ótedi, onda depýtattardyń 70 paıyzy partııalyq tizimniń proporsıonaldyq júıesi boıynsha, al 30 paıyzy majorıtarlyq júıe boıynsha saılanady, al saılaý úderisine áıelder men jastardyń belsendi qatysýyn qamtamasyz etý úshin Parlamenttegi depýtattyq mandattardy bólý kezinde áıelderge, jastarǵa jáne múgedekterge zańmen belgilengen 30 paıyzdyq kvota engizildi.

Sonymen qatar partııalardy tirkeý úderisi jeńildetilip, olardyń Qazaqstan Parlamenti Májilisine kirýi úshin shekteýler tómendetildi.

N.Onjanov kezdesý barysynda qatysýshylardy saılaý naýqanynyń barysy týraly habardar etip, kóptegen ulttyq jáne halyqaralyq baıqaýshylardyń, sonyń ishinde EQYU Parlamenttik assambleıasynyń saılaýdy baıqaý jónindegi músheleri retindegi nemis depýtattarynyń jáne EQYU-nyń uzaq merzimdi jáne qysqa merzimdi mıssııalaryna nemis baıqaýshylardyń qatysýyn qoldady.

«Bul saılaý qoǵamdaǵy ózgeristerdi kórsetedi jáne Qazaqstannyń saıası júıesin odan ári jańǵyrtýǵa serpin beredi. Bizdiń elimiz ulttyq zańnamaǵa jáne ozyq halyqaralyq tájirıbege sáıkes ádil saılaý ótkizýge umtylady», dedi Elshi.

Nemis sarapshylarynyń pikirinshe, partııalarǵa QR Parlamenti Májilisine ótý úshin daýystyń tómengi shegin Germanııanyń mysaly sekildi 7%-dan 5%-ǵa tómendetý parlamentke saıası áralýandyq ákeletin ońtaıly nusqanyń biri.

Ortalyq Azııa boıynsha sarapshy Angela Leeke óz tarapynan áıelderge, jastarǵa jáne múgedekterge oryn bólý kezinde 30 paıyzdyq kvotanyń engizilýi aıasynda Qazaqstandaǵy áıelderdiń róline erekshe nazar aýdardy. Onyń pikirinshe, Qazaqstanda «saıasatta da, bızneste de jarqyrap kórinetin talantty áıelder kóp jáne olardyń eldiń zań shyǵarýshy organynda kóbirek ókildik etýi onyń rólin kúsheıtetini sózsiz».

Uqsas jańalyqtar